22 ka bata gianod sa sapa

CEBU, Philippines - Diriyot mangaanod ang 22 ka mga batang taga sitio Dako, barangay Maghaway dakbayan sa Talisay nga nanglaba ug ang uban nangaligo sa Pinggan River sa lungsod sa Minglanilla kagahapon sa hapon dihang kalit nga mibuswak ang dakong baha sa maong sapa tungod sa pagbundak sa uwan.

Gumikan sa hitabo nagkaguliyang ang mga opisyales sa barangay sa lugar ug kapolisan ug mipahigayon og search and rescue operation sa ubos nga bahin sa maong sapa pasado alas 2 sa hapon.

Si Edwin Cabatas kapitan sa Maghaway sa pakighinabi niini sa Banat News kagahapon nagkanayon nga ang nahimutangan sa Pinggan River boundary sa Maghaway ug lungsod sa Minglanilla.

Ang mga polis sa Minglanilla ug Talisay ug sakop sa Talisay Rescue Emergency Action Team (TREAT) daling miresponde sa maong insidente ug nag-atang sa mga posibleng lugar nga maanoran sa mga bata.

Pasado alas 4:00 sa hapon si Cabatas nakadawat og mensahe gikan sa iyang konsehal nga nauli na ang nahisgutang mga bata.

Ang kapitan mibutyag sa mga ngalan sa mga diriyot maanod nga sila si Geraldine Bonghanoy, Marlo Dave Bonghanoy, Rommel Ababa, Rodel Ababa, Sonny Boy Ababa, Mark Bonghanoy, Marlene Lecera, Isabel Ababa, 14-anyos, Roy Lecera, Jerome Ababa, Joy Saneon, Freddie Cera Jr., Bernard Ababa, Kevin Ababa, Kevin Lecera, Reynard Ababa, Crisanto Bonghanoy, Kervin Ababa, Carmel Ababa, Lourdes Ababa, Badon Ababa ug Dave Ababa.

Si Isabel,14, nga nahinabi kagahapon sa DyAB mibutyag nga nanglaba siya diha sa sapa samtang ang uban kanila ang nangaligo dihang kalit lang nga dunay misinggit og “baha.”

Matud niini paspas kaayo ang sulog sa tubig maong wala dayon sila makapadaplin ug gianod padulong sa usa ka dakong bato diin sila nanungtong.

Gihulagway niyang lapas na sa ilang ulo ang gilawmon sa tubig ug kusog na usab kaayo ang bul-ug maong wala nalang sila mosuway og balik sa daplin.

Apan tulo sa ilang mga kauban diha sa maong bato ang misuway gyud og sawom padaplin apan didto na kini sa unahan hingpit nga nakakapyot sa mga gapnod.

Dangtan pa og pipila ka oras dihang usa sa ilang mga kauban nga ginganlan og Virgilio ang mikuha og bagon ug gilabay kanila, pinaagi niini nakatabok sila balik sa daplin.

Ang mga ginikanan ug paryente sa maong mga bata lakip na mga silingan naabot sa baybayon sa Talisay ug Minglanilla pagpangita kanila tungod sa pagtuong nangaanod na sila sa barangay Pakigne ug Tungkil.

Si Cabatas nagkanayon nga ang maong insidente leksiyon sa mga ginikanan nga dili gyud pasagdan ang ilang mga anak.

Kagahapon nakasinati og pagbaha ang dakbayan sa Sugbu tungod sa pagbundak sa uwan, pipila ka mga sakyanan ang nangapagngan sa makina ug nangatanggong sa tunga-tunga sa dalang gibahaan. - BANAT NEWS