CEBU, Philippines – Ang bag-ong nadugang nga magbabalaod nga party-list sa Sugbo, Pastor Alcover Jr. misaad kagahapon nga patukoran niya og monumento ang mga tawong gipamatay sa mga rebelde dinhi sa Sugbo ug sa tibuok nasud.
Si Alcover nga magrepresentar sa Alliance for Nationalism and Democracy (ANAD) sa kongreso miatubang sa taga media sa usa ka press conference ug nagkanayon nga dili angay kalimtan sa katilingban ang mga tawong inosente nga gipamatay sa mga New People’s Army (NPA).
Miingon si Alcover nga usahon niya pagtukod ang memorial wall nga maoy suwatan sa tanang ngalan sa mga tawong giihaw sa mga NPA gumikan sa pakigbisog sa mga walhon aron yatakan ang kagamhanan ug ipatigbabaw ang katuyoan nilang binuang.
Kini himoon ni Alcover kay dili siya gusto nga makalimtan sa katawhan ang binuhatang dautan sa mga NPA.
Gipasalig usab niya nga didto sa Kongreso bisan kun magtupad sila’g lingkoranan si Kongresista Satur Ocampo, dili siya mahadlok mowaldas sa kamatuoran bahin sa kalihokan sa mga rebelding komunista nga sa pagkakaron giisip nga miyembro sa teroristang grupo.
Mibahad usab siya nga mahimo ra nga wala siya’y opisina, basta ang mahinungdanon nga matag sesyon makatambong siya ug makapadayag sa mga sentimento niya batok sa mga rebelding komunista.
Misaad usab si Alcover nga kun suholan man siya sa gobiyerno, iyang igasto sa mga proyekto nga magpalig-on sa demokrasya sa nasud. – BANAT NEWS