CEBU, Philippines – Patay diha-diha ang usa ka gipasanginlang snatcher dihang gitabangan og bukbok sa mga estambay sa Gorordo Avenue sa barangay Camputhaw pasado alas-5 kagahapon sa hapon.
Ang gipatay mao si Sherwin Lanurias,22, taga barangay Bitoon sa lungsod sa Daanbantayan, kanhi kundoktor sa usa ka bus company human giingong gitabangan og gukod sa kapin napulo ka mga estambay ug gikulata.
Sa imbestigasyon sa kapolisan nasayran nga ang biktima giingong milabni sa cellphone nga N6500 sa usa ka mabdos nga giilang si Thelma Bernales kinsa naglakaw sa nahisgutang lugar.
Apan gikatahong misiyagit og pagpangayog tabang si Bernales nga nadunggan usab sa mga estambay sa lugar niadtong higayuna hinungdan nga ilahang gigukod si Lanurias.
Gikatahong kaduha makulatahi sa grupo si Lanurias apan sa unang pagkakorner kaniya nakaipsot kini ug nakapadayon sa pagdagan apan wala kini lung-i sa mga estambay nga nianang tungura mas midaghan na hinuon hangtud nga kini naabtan.
Sumala pa sa kapolisan gikatahong wala na makapanagang si Lanurias dihang bisan asang parte sa iyang lawas mitugpa ang mga kinumo ug patid sa mga tawo hangtud nga kini natumba.
Duna pay tawong giingong mipunit sa iyang ulo ug giparok kini sa sementadong dalan makadaghang higayon nga gituohang maoy nakaingon sa kamatayon niini.
Matud pa ni Chief Inspector Mario Monilar, hepe sa Cebu City Police Office, Homicide Section nga nahinabi sa Banat News ila pang gipaabot ang tagtungod sa biktima kung mopasaka ba og kaso batok sa mga estambay.
Apan nag-atubang karon og problema ang mga polis sanglit bisan dunay nakakita sa hitabo kung si kinsay mipatay kang Lanurias walay mipatim-aw paghatag sa ilang pamahayag.
Gisugdan na hinuon sa kapolisan pagtagsa-tagsa pag-ila ang maong mga estambay alang unya sa posibilidad nga pagpasaka sa kaso. - Lesley Caminade (BANAT NEWS)