CEBU, Philippines – Ang polis nga igsuon sa gibanhigang engineer nga migawas nga positibo sa paraffin testing sa PNP Crime Laboratory 7 nangangkong nag-firing sa iyang armas sa hinapos nga bulan niadtong bulan sa Marso.
Si SPO1 Silas Ceballo sa pakighinabi sa Banat News kaniya diha sa Provincial Police Office diin na siya madestino human girelibuhan nagkanayon nga wala siya mabalaka sa resulta sa maong paraffin test.
Dako ang iyang pagtuong ang gunpowder residue o powder burns diha sa iyang mga kamot nga migawas sa paraffin test posibleng gikan sa pagpraktis niya sa iyang armas niadtong hinapos sa bulan sa Marso.
Usa ka adlaw human sa pag-ambush kang Engineer Maliquias Ceballo sa barangay Pitogo sa lungsod sa Consolacion niadtong Abril, sila si SPO1 Ceballo uban sa iyang ig-agaw nga si SPO2 Ramon Perales boluntaryong mipailawom sa paraffin test aron malimpyohan ang ilang pangalan
Ang duha ka mga polis ug ang biktima nagtinubagay og kiha kaniadto hinungdan nga pareho silang giapil sa imbestigasyon kabahin sa maong ambush gawas pa sa uban pang anggulong gisubay sa kapolisan.
Nagkanayon usab si SPO1 Ceballo nga ang resulta sa paraffin testing dili magamit isip ibedensya sa korte.
Samtang gihangop niini ang pag-relibo kaniya tungod kay kabahin kini sa standard operating procedure sa kapolisan ug mihulagway nga safety siya gikan sa mga peligro diha sa bag-ong assignment gumikan sa paglambigit kaniya sa kaso. - Guam Logroño (BANAT NEWS)