Lalaki nakig-date giluba

CEBU, Philippines – Gidunggab ang usa ka batan-ong lalaki nga nakig-date sa iyang hinigugma sa atubangan sa city hall sa dakbayan sa Mandaue sa miaging gabii nga maoy nakaingon sa grabeng pagkaangol niini.

Ang biktima mao si Jomar Sarco, 18, ulitawo nga taga barangay Alang-Alang dakbayan sa Mandaue ug ang suspetsado nga nakadunggab mao si Junve Villacorta, 21, nga taga sitio Tribunal, barangay Centro sa maong dakbayan.

Si PO3 Protacio Tago Jr. sa Investigation and Detection Management Bureau sa kapolisan sa dakbayan miingon nga naglingkod lang ang biktima sa plaza kuyog sa iyang hinigugma sa dihang giduol sa suspetsado ug gidunggab sa icepick ang buko-buko niini.

Matud pa ni Tago nga human sa maong pagpanunggab, si Villacorta dali usab nga nakapahilayo sa maong dapit ug ang biktima dali nga gidala sa Mandaue City Hospital ug padayon pa nga giatiman sa mga doktor sa maong tambalanan.

Gituohan sa kapolisan nga gikasuyaan ang biktima nga nakig-date sa iyang hinigugma sa maong dapit nga maoy hinungdan nga kini nadunggaban. - Romeo T. Limpangog (BANAT NEWS)