Tanom sa dili pa graduation giduso

CEBU, Philippines – Gisuportahan ni Bokal Victor Maambong ang lakang sa pipila ka mga tunghaan dinhi sa Sugbu nga sa dili pa makagradwar ang mga tinun-an patamnon una kini og kahoy sa nagkadaiyang kabukiran sa Sugbu nga na-opaw na tungod sa kaingin ug paghimo og mga subdivision sa mga developer.

 Si Maambong nga mao usab ang chairman sa committee on environment sa hunta probinsiyal nagkanayon nga dako kaayo og ikatabang ang maong programa sa pipila ka mga tunghaan tungod kay makat-on ang mga tinun-an nga makatampo sila sa pagpreserbar sa kalikupan.

 Gisuportahan usab ni Maambong ang lakang sa MCWD nga mag-awhag sa mga tunghaan sa pagpahigayon og tree planting activities atol sa panahon sa ting-uwan aron siguradong motubo ang gitisok nga mga seedlings.

 Sumala pa ni Maambong nga mas maayo nga ang tree planting alang sa mga graduating students ipahigayon sa bulan sa Hunyo hangtod na sa bulan sa Disyembre nga rainy season ug dili sa bulan sa Enero hangtod sa Mayo nga dry season kay segurado gyud nga dili mamatay ang gitanom nga seedling ug dili makawang ang kahago sa mga tinun-an.

 Si Maambong nakadayeg sa baruganan sa MCWD sa pagluwat sa maong awhag tungod sa gitinguha niini nga makab-ot ang high survival rate alang sa natanom nga mga seedling sa nagkadaiyang mga sektor ingon man ang pag-promote sa reforestation program sa nagkalainlaing mga environmental groups nga nakabase dinhi sa Sugbu ug   lukop nasud. - Chester Abadilla (BANAT NEWS)