'Nangawat' Manok gipusil

CEBU, Philippines – Kritikal ang kahimtang sa gitumbok nga kawatan og mga manok igtatari nga taga Pasil siyudad sa Sugbo human kini masakpi sa akto ug gigukod sa mga estambay human giingon nanghilabot og mga manok igtatari didto sa barangay Tunghaan, lungsod sa Minglanilla niadtong Huwebes sa alas 4:35 sa kaadlawon. Ang biktima mao si Raymund Anabisa, 26, ulitawo ug molupyo sa Pasil siyudad sa Sugbo samtang ang mga suspek mao ang lima ka mga tawo nga wala pa mailhi sa kapolisan sa paghimo ning balita.

Matud ni SPO4 Remegio Elacion sa Minglanilla Police Station sa dihang nahinabi sa Banat News ang biktima samtang naglakaw sa barangay road sa maong lugar kalit lang giduol sa lima ka mga tawo ug gipusil ug naigo sa sentro sa dughan ug dayong sibat sa mga namusil ug gidala sa Minglanilla District hospital apan gibalhin dayon sa Vicente Sotto Memorial Medical Center (VSMMC) tungod sa seryoso nga kahimtang.

Dugang nahipos nga impormasyon nga ang biktima maoy kini gidudahan nga responsable sa mga nahitabong pagpangawat sa mga manok igtatari sa maong lugar.

Gani human sa hitabo, dunay upat ka mga tawo nga sila si Ronald Castañares, Jeremias Navarro, Jeffrey Abalo ug Rogelio Endino boluntaryong mitugyan sa kapolisan sa lima ka mga manok igtatari ug laing duha ka patay nga manok igtatari nga ilang nakit-an nga gisulod sa sako didto sa lugar sa nahitaboan sa krimen.

Gipasangil sa mga residente nga ang maong mga manok igtatari nga nakit-an mga kinawat ni Anabisa. - Darrel Carumba (BANAT NEWS)