Ex-chief sa MILF miduaw sa Mandaue

CEBU, Philippines – Ang kanhi kumander sa Moro Islamic Liberation Front (MILF) sa lungsod sa Barira ug Buldon sa lalawigan sa Maguindanao maoy nalakip sa 150 ka delegasyon nga miapil sa educational tour nga mibisita sa dakbayan sa Mandaue kagahapon.

Si Tripolio Ragundo nga usa na karon ka barangay chairman sa barangay Panggao, lungsod sa Barira mao kanhi ang ground commander sa MILF niadtong panahon nga nahitabo ang kagubot sa ilang dapit sa tuig 2000.

Si Barira Mayor Alexander Tomawis kinsa maoy nangulo sa delegasyon atol sa press conference mipadayag sa ilang intensiyon pagduaw sa dakbayan.

Dugang pa ni Tomawis nga tinguha usab nilang masayran sa katawhan dinhi sa Sugbu nga malinawon ang ilang lugar ug hingpit nga gidili sa ilang dapit ang tanang matang sa sugal ug pag-inom og ilimnong makahubog.

Kini usa ka dakong sukwahi sa mga migawas nga taho nga kanunay masentro sa kagubot ang ilang dapit nga maoy hinungdan sa bationg kahadlok sa mga magpapatigayon sa pagbutang sa ilang negosyo.

Gipasabot ni Tomawis nga ang mga MILF ug MNLF ang mahigugmaon usab sa kahapsay ug kalinaw ug naglantaw usab og kalamboan sama dinhi sa Sugbu.

Giklaro ni Tomawis nga lakip usab sila sa mga nagkondinar sa kalihukan sa Abu Sayyaf nga ilang giisip nga grupo sa mga kriminal didto sa pipila ka dapit sa Mindanao apan layo lamang usab kini sa Barira ug Buldon.

Si Tomawis miangkon nga sama sa tuig 2000, ang ilang dapit nakasinati na usab og kagubot diin usab nahimutang kaniadto ang Camp Abubacar.

Ang mao nilang kasinatian ilang gitinguha nga malubong na sa hingpit sa kalimot ug mahimo na lamang kining kabahin sa ilang kasaysayan sanglit ang ilang pangindahay karong panahona ang tinud-anay nga kalambuan. – BANAT NEWS