CEBU, Philippines – Gisuspenso na ang drayber nga maoy nagmaneho sa minibus sa barangay Sambag 1 nga nahulog sa pangpang sa barangay Busay niadtong miaging Miyerkules nga mikalas og duha ug miangol sa kapin 40 ka tawo.
Matud pa sa barangay kapitan sa Sambag 1 nga si Jerry Guardo, gipaubos na sa indefinite suspension si Rufino Secretaria samtang gipahigayon pa ang ilang imbestigasyon.
Sa pagsuwat ning balita pabilin pa si Secretaria sa Chong Hua Hospital samtang gitakda usab sa traffic division kagahapon ang pagpasaka og kaso batok kaniya.
Sa pikas bahin, gipahibawo ni Guardo nga gitakda nang mogawas kagahapong adlawa ang 18 ka mga biktima nga na-admit sa mga tambalanan.
Nagkanayon ang kapitan nga ilang giatiman ang mga bayranan sa mga pasyente uban usab sa pag-abag sa pipila sa ilang mga donors.
Samtang gihimakak usab sa kapitan ang report nga wala ma-renew ang rehistro sa ilang minibus tungod kay kumpleto ang mga dokumento sa ilang mga sakyanan sa barangay tungod kay kini dunay insurance.
“We have all the documents and we will present it sa proper forum, in fact, dili man na modawat ang insurance kun dili rehistrado imong sakyanan,” sumala ni Guardo. (Elly Bolonos)
Barko gikan Siquijor naaberya 392 ka pasahero gi-rescue sa Coast Guard
Usa ka barkong dunay sakay nga 392 ka mga pasahero ug 25 ka mga tripulante ang na-aberiya sa kadagatan sa lungsod sa Larena sa Siquijor kagahapong adlawa pipila palang ka minutos gikan mobiya sa pantalan.
Ang tigpamaba sa Coast Guard District Central and Eastern Visayas Commander Anelito Gabisan mikumpirmar nga naaberiya ang barkong M/V Don Martin Sr.-8 nga gipanag-iya sa Palacio Shipping Lines.
Matud pa ni Gabisan ang maong barko migikan sa Plaridel Misamis Occidental alas 12:00 sa udto niadtong Huwebes ug paingon unta kini dinhi sa pantalan sa Sugbo apan pag-abot sa maong lugar nakasugat kini og kakulian dihang nadaut ang propeller niini.
Ang maong barko mi-angkorahe nalang sa lawod gibana-banang 3.2 nautical miles gikan sa pantalan sa Larena.
Pagka-alas 8:00 sa buntag nakahukom ang mga pasahero nga manganaog ug namalhin sa nangabot nga mga motorbanca ug sakop sa Coast Guard sa Dumaguete. Walay gikareport nga naangol sa mga pasahero nga kasamtangang gidala sa Dumaguete.
Ang Coast Guard nagpaabot pa sa marine protest gikan sa kapitan sa barko aron maoy ilang basihan sa himoong pakisusi. - Darrel Carumba (BANAT NEWS)