CEBU, Philippines – Mga kapitan sa dakbayan gipaubos sa seminar labot sa Akta Republika 9485 kon ang Anti-Red Tape Act of 2007 sa Department of Interior and Local Government (DILG).
Matud pa ni City DILG Director Patricio Gabuya nga angayan lang masayod sa nahisgutang balaud ang mga barangay kapitan tungod kay kini nagtangag og silot.
Ang mga opisyal sa gobiyerno lakip na sa mga barangay kapitan nga makalapas sa Akta Republika 9485 mahimong masuspenso o matangtang sa serbisyo.
Nasayran nga 30 ka adlaw nga pagkasuspenso ang silot sa unang kasaypanan ug dunay mandatory attendance sa Values Orientation Program.
Samtang tulo ka buwan usab nga pagkasuspenso sa ikaduhang higayon ug pagkatangtang na sa serbisyo sa ikatulong higayon ug did-an nang makaserbisyo og balik sa gobiyerno ang gitaktak nga opisyal.
Tumong sa Anti-Red Tape Act of 2007 mao ang pagpalambo sa government service pinaagi sa pagpaminos sa gitawag og bureaucratic red tape kon kahasol paghatag sa mga serbisyo ngadto sa katawhang nagkinahanglan niini sama sa pagpasa-pasa kanila.
Kini gumikan kay daghang mga yanong konstituwente nagdumili na pagduol sa ilang mga barangay officials gumikan sa kawalay kabangkaagan sa maong trabaho ang mga naglingkod sa maong mga katungdanan ug sagad ipasa-pasa nalang sila niini.
Subay niini niingon si Gabuya nga ang mga barangay kapitan gimanduan paghimo sa ilang tagsa-tagsa ka manual operation o citizen’s charter nga maoy magiya sa publiko kung kinsa ang duolon sa barangay paglukat og mga permit, clearances, pilay bayronon ug uban pa.
Ang citizen’s charter ipasumitir hangtud sa buwan sa Septembre ug kini kinahanglang sundon aron di mag-atubang og problema ang mga kapitan sa ilang pagpangatungdanan. - Elly Bolonos (BANAT NEWS)