Polis Positibo Sa Paraffin Test

CEBU, Philippines – Migawas nga positibo sa gunpowder residue ang paraffin test nga gihimo sa duha ka mga kamot ni SPO4 Silas Ceballo ang hepe sa traffic division sa lungsod sa Compostela nga igsuon sa gibanhigang engineer sa Consolacion.

Ang maong polis boluntaryong nagpa-paraffin niadtong milabay’ng semana uban sa iyang ig-agaw nga si SPO2 Ramon Perales apan ang naulahi negatibo sa gunpowder residue.

Kini maoy gipahibalo ni Dr. Nestor Satur ang regional officer sa PNP Crime Laboratory 7.

Ang duha nagpa-paraffin test human mogawas ang ilang pangalan sa mga balita human banhigi sa tulo ka tawong nagsakay og motorsiklo si Engineer Maliquias Ceballo nga maguwang ni SPO4 Ceballo.

Ang maong mga polis ug ang biktima nagkinihaay sa wala pa mahitabo ang pagpamanhig.

Si Satur mipasabot hinuon nga bisan paman mogawas nga positibo ang usa ka tawo sa paraffin test dili kini conclusive nga ibedensya sa korte apan makatabang lang hinuon sa kapulisan sa ilang imbestigasyon.

Usa sa mga rason mao nga mapositibo ang usa ka tawo sa nitrate residue (gunpowder) gawas lang kun makapabuto og armas gumikan kay ang uban mikadlit og posporo, migunit og abuno ug uban pang matang sa kemikal nga dunay presensya sa nitrate.

Ang duha ka mga polis kusganong mihimakak nga may kalambigitan sa maong ambush.

Ang mga imbestigador sa kapulisan sa Consolacion ang nagpadayon pa pagkuha’g mga impormasyon sa maong krimen ug gitutukan niini ang tulo ka mga anggulo nga nalambigit sa kaso sa biktima sa igsuong polis, yuta, ug ang personal nga nakabingkil sa trabaho.

Si Engr. Ceballo nakabsan dayon sa kinabuhi human pusila makadaghang higayon sa tulo ka mga mamumunong nagsakay’g motorsiklo diha sa barangay Pitogo lungsod sa Consolacion samtang nagpadulong motrabaho gikan sa iyang panimalay sa Cogon, Compostela.

Usa nga nakalangay sa imbestigasyon sa kapulisan mao nga naglisod sila pagkuha’g mga testigos sa crime scene tungod kay maglisod usab sila sa pag-ila sa mga suspetsado nga naka-helmet niadtong higayuna.

Samtang si SPO1 Ceballo nga gikuhaan unta sa iyang habig sa Banat News dili makontak ang numero sa iyang cellphone. - BANAT NEWS