Sambag 1 way kalapasan

CEBU, Philippines – Walay nakitang kalapasan ang Department of Interior and Local Government sa pagpaabang sa sakyanan sa gobiyerno sa barangay Sambag Uno nga nahagbong niadtong Miyerkules sa buntag diha sa sitio Maaslom, barangay Busay nga mikalas og duha ka kinabuhi lakip na ang 8 anyos nga batang lalaki ug niangol sa kapin 40 ka mga sakop sa Legion of Mary.

Si DILG-7 Regional director Pedro Noval miingon ang barangay Sambag Uno nag-practice lang sa ilang corporate power nga entitled sa tanang barangay.

Mipasabot si Noval nga kada barangay dunay katungod niini basta ang kwartang kitaon mapunta lang sa panudlanan sa barangay ug kini aron makatabang sa galastuhan sa mga development project.

Matud pa ni Noval ang importante diha mao nga nagkasinabot ang duha ka hingtungdan ang barangay Sambag Uno ug mga sakop sa Legion of Mary sa barangay Babag II kinsa maoy nangabang niini pinaagi sa kasabotan ug kinahanglang dunay resibo sa transaksyon.

“Ari sad mo-sud ang Commission on Audit, i-monitor man sad na and expenditures nila per barangay,” pasabot pang Noval kabahin sa kitaon sa mga barangay pinaagi sa pagpaabang.

Hinuon nagkanayon siya nga ang minibus iya man sa barangay Sambag Uno, gikinahanglan nga mga residente niini maoy hatagan og prayoridad kung magkinahanglan.

Apan si Kapitan Jerry Guardo sa barangay Sambag Uno miklaro nga ang iyang minibus dili matawag nga gipaabangan tungod kay wala siya mangayo og bayad niini.

Ang iya lang nga kun kinsa kadtong mogamit sila na maoy magpatubil og gasolina niini.

Samtang gipahimangnoan karon sa Committee on Transportation sa konseho sa siyudad sa Sugbu, Konsehal Sylvan Jakosalem ang kabarangayan sa dakbayan nga regular nga susihon ang kahimtang sa ilang mga sakyanan.

   Wala pa hinuon matino kung unsa ang tinud-anay nga hinungdan sa pagkahulog sa nahisgutang sakyanan diha sa barangay Busay apan ang drayber niini nga si Rufino Secretaria una nang mipadayag nga mibuto ang brake niini.

    Sa samang higayon gisugyot usab sa konsehal nga klarohon ang qualifications sa mga drayber nga modala og minibus sa barangay.

 Ang Visayas Ombudsman mopahigayon og imbestigasyon sa maong aksidente sumala pa ni Assistant Ombudsman for the Visayas, Virginia Palanca-Santiago.

Ang maong minibus giabangan sa grupong Legion of Mary alang sa giingong pagpangaligo sa dagat apan nadisgrasya na hinuon sa Busay.

 Matud pa ni Santiago nga ipatawag unya nila ang mga barangay officials sa barangay Sambag 1 aron masuta kun legal ba o kaha may awtorisasyon ang pagpaabang sa maong sakyanan.

 Kinahanglan mapasabot sa barangay kun may resibo kini sa pagpaabang sa maong sakyanan, hain paingon ang kitaon niini ug uban pa.(Rey Pasaporte, Chester Abadilla ug Elly Bolonos) (BANAT NEWS)