Cebu misuporta sa Earth Day

CEBU, Philippines – Mipadayag og dakong suporta ang nagkadaiyang lokal nga kagamhanan sa Sugbu sa pagpahigayon sa Earth Day pinaagi sa paglusad og nagkadaiyang kalihukan kabahin niini.

Ang kagamhanan sa siyudad sa Sugbu ug ang Probinsiya sa Sugbu milusad sa ilang "Carbon Cutting Coalition versus Climate Change," nga kampanya nga gipasiugdahan ni Presidential Adviser on Global Warming and Climate Change Secretary Heherson Alvarez.

Si Governor Gwendolyn Garcia maoy personal nga midawat sa Climate Change Coalition Flag gikan ni Alvarez sa sulod sa Social Hall sa Kapitolyo nga gisaksihan sa mga dagkong negosyante sa probinsiya.

Sa maong seremonya, si Alvares miingon nga ang nasud mideklarar og gubat batok sa climate change hinungdan nga naumol ang maong kwalisyon aron matabangan ang pagpangita sa solusyon sa global warming.

Samtang si Garcia misaad nga mangulo ang probinsya pagpamenus o ba kaha pagwagtang na sa mga planta ug industriyang nagbugwak og carbon dioxide.

Ang padayong pagbugwak sa maong aso ug uban pang kemikal sa palibot sukad pa kaniadto tungod sa industriyalisasyon sa mga milambong nasud dako og nahimong epekto sa kinaiyahan karon nga gitawag na karong global warming kon pag-init na sa temperatura sa kalibutan.

Si Garcia mipirma og Memorandum of Understanding kon MOU tali sa siyam ka mga dagkong kompanya sa Sugbu alang sa usa ka interruptible load program aron manggamit nalang sila sa ilang generator alang sa ilang gikinahanglang power supply pag-operate.

Pipila sa mga nipirma sa maong kasabutan mao ang mga tag-iya ug management sa Ayala; SM City- Cebu; San Miguel Corporation; Elizabeth; Mall; Gaisano Group of Companies ug Waterfront Hotel and Casino.

Samtang si Acting Cebu City mayor Mike Rama nga mirepresentar sa dakbayan miapil sa maong kwalisyon sa linaing seremonyas diha sa seminar-workshop sa Philippine Association of Government Budget Administration kon PAGBA Inc. sa Montebello Villa Hotel sa barangay Banilad ning siyudad.

Ang kapin sa 500 ka mga miyembro sa PAGBA gipangulohan ni Cyril Ramos mipalanog usab sa ilang suporta sa climate change program.

Samtang ang dakbayan sa Lapulapu milusad sa ilang kaugalingong paagi sa pagsanong sa panawagan pinaagi sa coastal ug beach clean up sa susamang adlaw.

Matud pa ni Lapulapu City Association of Barangay Captains President Leo Mercado tinuig na nga kalihukan sa pagsaulog sa Kadaugan sa Mactan ang pagpanglimpyo atol usab sa Earth Day celebration.

Sa Mactan Shrine naghugop ang tanang mga empleyado sa kagamhanang lokal sa Lapulapu nga nanglimpiyo inubanan usab sa mga grupo gikan sa law enforcement units, Philippine Air Force, Philippine Navy. (Chester Abadilla uban sa report ni Bong Sorinao) (BANAT NEWS)