Ihawan sa Talisay pasado sa inspeksyon
CEBU, Philippines – Ihawan sa dakbayan sa Talisay pasar gihapon sa “AA” standard matud ni Talisay City Administrator Richel Bacaltos human sa gihimong inspeksyon sa mga sakop sa National Meat Inspection Service.
Si Bacaltos sa pakighinabi niini sa Banat News kagahapon nagkanayon nga niadtong Miyerkules ug Huwebes mipahigayon og inspection diha sa ihawan ang mga opisyal sa NMIS nga sila si Roger Pinamora, lead auditor sa ilang Central Office; Jose Caritan sa NMIS-7; Dr. Glendon Alvarez sa NMIS-8 (Tacloban) ug Dr. Alvin Leal, Good Manufacturing Practice (GMP) NMIS- 7.
Matud pa ni Bacaltos nga ang ihawan sa dakbayan nga nagsulod og kwarta sa panudlanan sa siyudad wala pa hinuon mahatagi dayon sa “AA” standard certification human sa inspeksyon.
Kini gumikan kay ipadala pa ngadto sa kaulohan ang resulta sa inspeksyon una pa kini ihatag sa NMIS-Manila.
Ang nahisgutang ihawan nagsugod og operate niadtong tuig 2005 ug sulod sa upat ka tuig namintenar niini ang nahisgutang standard.
Hinuon gibutyag sa city administrator nga dunay nakit-ang ginagmay nga mga problema ang mga inspectors diha sa ihawan apan wala kini makaapekto sa paggrado sa kinatibuk-ang pasilidad.
Si Bacaltos ang mibutyag nga mosalmot sila sa national competition alang sa “Best Slaughterhouse” sa “AA” category ug gani karon nagsusi na sila ngadto sa NMIS kung kwalipikado ba silang mosalmot sa maong kompetisyon.
Ang tanang mga rekisitos sa kompetisyon isumitir karong umaabot buwan sa Hunyo. (Brenda Batuto) (BANAT NEWS)
- Latest
- Trending
