CEBU, Philippines – Gidayeg ni provincial board member Victor Maambong ang Department of Health (DOH) tungod sa paglusad niini sa programang Garantisadong Pambata Campaign nga nagtanyag og nagkadaiyang health care services alang sa inahan ug masusong bata niini.
Matud pa ni Maambong nga iyang nasayran nga misaka ang gidaghanon sa mga inahang nanganak ug mga batang bag-ong gianak hangtud sa nagpangidaron og 5 ka tuig.
Sa programang Garantisadong Pambata edukahon ang mga inahan bahin sa tukmang paagi sa pag-atiman sa ilang kaugalingon atol sa ilang pagmabdos, pagpanganak ug paghuman sa pagpanganak, breast feeding, complementary feeding, micronutrients supplementation and deworming.
Apil usab sa maong programa sa DOH ang gikinahanglang pagpamakuna sa mga kabataan lakip na ang mga inahan, integrated management alang sa pag-atiman sa nagkasakit nga bata, paglikay ug pagkontrola sa pagkasamad ug pagkapiang sa bata niini ug labaw sa tanan, ang gihingusgan nga birth spacing advice sa tinguha nga motaas-taas ang gintang sa pagpanganak.
Ang napasar nga resulosyon ni Maambong nga gipaluyohan usab ni Bokal Peter John Calderon ug kinabag-ang mga sakop sa hunta probinsiyal ihatud unya nila ngadto sa buhatan sa DOH partikular na ni Assistant Secretary Dr. Paulyn Jean Rosell. (Chester Abadilla) (BANAT NEWS)