CEBU, Philippines – Giawhag karon sa Cebu City Schools Division ang mga ginikanan nga patunghaon sa summer pre-school ang mga bata niini nga i-enroll sa grade 1 sa sunod tuig-tingtungha.
Partikular na niini ang kabataan nga wala makatungha sa day care o sa kindergarten ba hinoon apan mo-grade 1 na sa umaabot nga school year.
Kini aron dili maawahi sa leksyon ug mabiyaan sa ubang mga tinun-an sa higayon nga magsugod na ang klase karong buwan sa Hunyo.
Nabalaka si City Schools Division Superintendent Doctor Lorna Rances nga ang kakuwang sa kahibawo sa mga bata makatampo sa drop-out rate sa mga tinun-an.
Nagkanayon si Rances nga nagsugod na ang summer pre-school niadtong miaging semana apan nagpadayon pa ang pagpanawat sa mga tinun-an.
Sa pikas bahin, gipahibawo usab ni Rances nga nagpadayon na ang enrollment sa nagkadaiyang publikong mga tunghaan sa dakbayan.
Matud pa niya nga ang mga tunghaan niadto pang buwan sa Enero nagsugod og panglista sa mga bata nga mo-grade 1 sa sunod tuig-tingtungha.
Tambag sa City Schools Division Superintendent ngadto sa mga ginikanan nga karon pa lang daan, mopalista na sa ilang mga anak.
Kini aron dili na magpunsisok sa pagpa-enroll atol sa pagbukas sa klase ug magproblema na hinoon sa pagpatungha sa ilang mga anak.
Sa makausa pa gipahibawo ni Rances nga libre ug walay bayad ang pagpa-enroll sa mga tinun-an sa nagkadaiyang tunghaan sa dakbayan. (Elly Bolonos) (BANAT NEWS)