CEBU, Philippines - Lain na usab nga mga video karera ug moli-moli machine ang gipangdugmok kagahapong adlawa diha sa Cebu City Hall.
Ang 40 ka video karera ug 35 ka moli-moli machine nga gipangbungkag naggikan sa pipila ka urban barangay sa siyudad.
Kini sama sa Ermita, Pasil, Calamba, Duljo-Fatima ug uban pa nga gipahigayonan og mga pagpangronda sa kapolisan sa dakbayan.
Matod ni Felix Jose Lazarte sa buhatan ni Konsehal Augustus Pe Jr., nga ang pagpangguba maoy kabahin sa ilang hinugtanay nga kampanya batok sa ilegal nga sugal.
Namatikdan hinuon ni Lazarte sa nangaging mga buwan nga naglisod na ang mga video karera ug moli-moli operation sa siyudad.