CEBU, Philippines - Gitin-aw karon sa mga opisyales sa Land Transportation Franchising and Regulatory Board (LTFRB) nga mahinayon ang public hearing sa gisugyot nga roll-back sa plitehan ngadto sa P6 karong adlawa didto sa ilang ulohang buhatan sa Manila.
Mao kini ang gibutyag ni LTFRB chairman Roberto Suansing kinsa nagkanayon nga imbitado gihapon si manlalaban Manuel Iway ang usa ka Sugbuanong mipetisyon sa pagpabalik sa plitehan ngadto sa P6 .
Lakip sa gipaabot nga mutambong sa maong pagpaminaw, mao ang nagkadaiyang sektor nga apektado sa petisyon ilabi na sa transport sector sa tibuok nasud.
Matud pa ni Suansing nga sa public hearing karon ila usab nga tukion ang laing petisyon nga giduso usab sa transport sector nga nagtinguha sa pagbalik sa plitehan sa PUJ ngadto na sa P7 alang sa Sugbu ug sa Central Visayas tungod usab sa nagsunodsunod nga pagsaka sa presyo sa mga produkto sa petrolyo. Hinuon ang resulta niini mag-agad lang sa desisyon nga ipahigayon sa mga kadagkoan sa maong ahensya. - Chester Abadilla (BANAT NEWS)