Cebu Philippines - Giawhag ni ABC president Eugenio “Jingjing” Faelnar ang kabarangayan ug kapulisan sa dakbayan nga ipatuman ang Kite-Flying Ordinance sa siyudad.
Kini tungod kay naobserbahan sa ABC president nga daghan na usab ang kabataan ang nagpalupad og tabanog daplin sa kadalanan sa dakbayan.
Nabalaka si Faelnar nga madisgrasya ang mga bata kung molambod ang higot sa tabanog ngadto sa linya sa kuryente lakip na sa mga sakyanan nga nagdagan.
Ang ABC president nipadala na og Memorandum Order ngadto sa kabarangayan alang sa hingpit nga pagpatuman sa nahisgutang ordinansa.Nagkanayon usab si Faelnar nga iyang pakighinabian si Cebu City Police Office Director Sr. Supt. Patrocinio Comendador alang sa pag-implimentar niini.
“Kay sa akong nasayran wala pa man gyud ta kasilot niadtong nakalapas sa ordinansa mao nga akong ingnon si Comendador ana,” sumala ni Faelnar.
Base sa Kite-Flying Ordinance sa dakbayan, gitugot lang ang pagpalupad og tabanog sa mga open spaces nga dunay dili momenos sa 3,000 ka metro kwadrado.
Hugot nga gidili sa ordinansa ang pagpanabanog sa mga dapit duol sa karsada, tulay ug sa ubang lugar nga dunay mga linya sa kuryente.
Gidid-an usab ang mga bata nga nagpangidaron og 12-anyos paubos nga magpalupad og tabanog nga walay kaubang hingkod.
Ang mga ginikanan o ang nagbantay unya sa mga minor de edad ang mag-atubang unya og silot niadtong makalapas sa nahisgutang ordinansa.P200 lang hinoon ang multa nga nalatid sa ordinansa ug dunay pagkabilanggo nga dili moubos sa lima ka adlaw depende sa desisyon sa korte.
Subay niini gipahimangnoan ni Faelnar ang mga ginikanan ilabi na niadtong magpalupad og tabanog nga mosunod sa nalatid sa ordinansa.
Tambag sa ABC president nga adto lang mopalupad og tabanog sa South Road properties (SRP) aron malikayan ang disgrasya.(Elly Bolonos) (BANAT NEWS)