... liquidation squad 'suspek'

Cebu Philippines - Naalarma na ang mga residente sa lungsod sa Balamban tungod sa pagdaghan na sa kaso sa mga pagpamatay sa ilang lugar nga gibuhat sa mga tawong mag-motorsiklo ug magtabon sa mga nawong nga giila karon sa taga Balamban nga “liquidation squad.”

Apan ang maong kabalaka wala pa makaabot   sa buhatan sa Cebu Provincial Police Office, apan si Sr. Supt. Carmelo Valmoria, direktor sa maong buhatan mimando na sa pagsusi sa maong report.

Matud pa ni Valmoria makapaalarma na gyud kini sanglit sagad niini wala pa gihapon masulbad sa lokal nga kapolisan.

Niadtong Domingo sa gabii, tulo ka tawo ang gipusil patay, ang usa kanila sakop sa Lupong Tagapamayapa sa barangay Prensa sa maong lungsod nga giilang si Macario Lumayno, 70.

Lakip sa gipatay mao ang duha niya ka mga anak nga sila si Jomar,30 ug Melvin, 26.

Subay niini, iya usab karong gipa-check sa iyang imbestigador nga gipadala sa lugar ang mga background sa pamilyang Lumayno human ilang nahibaw-an nga dili kini lumad nga taga Balamban ug gikan kini sa barangay Colinia lungsud sa Tuburan.

Giawhag usab niya ang mga tawong dunay kasayuran sa maong krimin nga mopatim-aw ug moabag sa kapulisan sa paghatag og dugang impormasyon nga makatabang sa imbestigasyon sa pagsulbad sa maong kaso.

Dugang pa niini nga dunay nahitabong panagbugno tali kang Jomar ug sa mga mamumuno gumikan kay dunay powder burn ang kamot niini.(Guam Logroño) (BANAT NEWS)