Binas iperme sa Talisay
CEBU, Philippines - Ang mga sakop sa konseho sa dakbayan sa Talisay mipasar og resolusyon nga naghangyo kang Police Provincial Director Carmelo Valmoria nga himuon nang permamenteng hepe sa kapolisan sa dakbayan si Superintendent Henry Binas.
Si Konsehal Arturo Bas, tsirman sa komitiba sa kahapsay ug kalinaw sa konseho sa dakbayan sa pakighinabi niini sa Banat News kagahapon mibutyag nga kontento sila sa serbisyo ni Binas ug daku usab ang ilang pagsalig niini sa pagdala sa Talisay City Police Station.
Si Bas midugang nga padalhan nila og kopya si Valmoria sa nahisgutang resolusyon nga naaprobahan sa konseho niadtong Abril 7, 2000.
Sa laing bahin, base sa talaan sa kapolisan sa Talisay niadtong tuig 2007 ang gidaghanon sa kaso sa murder mikabat ngadto sa 34, homicide, 35, physical injury, 154, rape, 13, robbery, 181 ug 258 ang theft.
Itandi sa tuig 2008, nga ang kaso sa murder, 18 lang ug mikunhod kini og katunga, ang homicide, 37 misaka kini og duha, 139 ang physical injury, 10 ang rape, 80 ang robbery ug 219 ang theft ug sa katibuk-an mikalma gyud pag-ayo ang krimen sa Talisay karong si Binas na maoy nangulo sa kapolisan sa maong dakbayan, matud pa ni Bas. (Brenda D. Batuto) (BANAT NEWS)
- Latest
- Trending
