CEBU, Philippines - Usa ka tawo kinsa giingong natulog sulod sa sakyanan gumikan sa hilabihang kalasbag napalgan kining patay na didto sa barangay Pagsabungan, dakbayan sa Mandaue kagahapon sa alas 5:00 sa buntag.
Ang biktima mao si Vicente Cabahug, 39, ulitawo, nga lumad nga taga Borbon, Cebu apan temporaryo kining nagpuyo sa barangay Tabok, dakbayan sa Mandaue.
Si SPO3 Protacio Tago Jr. sa Investigation Detection and Management Bureau (IDMB) sa Mandaue City Police Office mibutyag sa Banat News nga nakig-inom pa ang biktima sa duha niini ka higala sulod sa usa ka videokehan sa maong lugar.
Giila ang duha nga mao sila si Jose Demecillo ug Jonathan Inot, pulos hingkod, ug mga drayber sa taxi sa maong dakbayan. Matud pa ni SPO3 Tago nga puwerti pang kanta-kanta sa maong biktima ug nangagda pa kuno sa iyang mga kauban nga mobalhin sila og laing balay kalingawan kay gusto pa kining magtagbaw sa inom.
Apan dihang mibarog kini, nabarag kuno ang biktima gumikan sa kalipong sa bino nga gilala niini busa gihatod sa duha niini ka kauban ngadto sa usa ka nag-parking nga van ug gipakatulog.
Samtang natulog ang biktima, sila si Demecillo ug Inot nagpadayon sa ilang inom, ug dihang alas 5:00 na sa kabuntagon, ila nang gipukaw ang biktima aron mamauli na sila apan nakurat kuno sila kay namugnaw na ang biktima, wala na maginhawa kay diay patay na.
Hinuon gisusi pa kini sa kapolisan kun wala bay foul play ang kamatayon sa biktima.