CEBU, Philippines - Giawhag karon sa Cebu City Health Department (CHD) ang mga opisyal sa kabarangayan sa dakbayan nga mosugod na pagpanglimpyo sa ilang dapit. Partikular na niini ang paghawan sa kasapaan, canal, drainage system, nga dunay mga basura nga maoy hinungdan sa pag-awas sa tubig panahon sa ting-uwan.
Matud sa dengue coordinator sa City Health nga si Dorenda Macasucol nga karon ang tukmang higayon sa pagpanglimpyo tungod usab sa nagpadayong kainit sa panahon.
Sa samang higayon giawhag usab ni Macasucol ang mga molupyo sa siyudad nga motabang sa ilang mga opisyal sa barangay sa clean-up drive.
“Karon ang time nga himoong intensive ang pagpanglimpyo kay bakasyon man, inig balik sa klase which is ting-uwan na sab dili na dako ang trabaho,” sumala ni Macasucol.
Tumong ni Macasucol sa pag-awhag sa mga molupyo nga manglimpyo, mao ang pagpaminos pa kun dili man hingpit mawagtang ang mga kaso sa dengue sa siyudad.
Gipadayag hinuon ni Macasucol nga padayong nius-os ang dengue cases sa dakbayan sa unang tulo ka buwan niining tuiga.
Gikan sa buwan sa Enero hangtud niadtong miaging Marso 31, ang City Health nakatala lang og 226 ka kaso ug unom ang patay. Kini mas ubos itandi sa susamang period niadtong miaging tuig nga dunay 393 ka dengue cases ug 20 ka kinabuhi usab ang nakalas.
Apan matud ni Macasucol nga makapaalarma gihapon ang mga kaso sa dengue niining tuiga tungod kay duna gihapoy namatay sa maong sakit maong kinahanglang doblehon ang pagpakabana sa mga molupyo ingon man sa mga opisyal sa kabarangayan paglimpyo sa ilang lugar. (Elly Bolonos) (BANAT NEWS)