CEBU, Philippines - Si kanhi Senador Vicente 'Tito' Sotto III gitakdang makigtagbo sa mga opisyal sa kagamhanan sa lungsod sa Balamban ugmang adlawa aron hisgotan ang bahin sa proyekto nga pagpananom og abaka isip alternatibong pananom sa kaumahan hulip sa tanom nga marijuana.
Si Sotto kinsa maoy chairman sa Dangerous Drugs Board (DDB) milusad sa usa ka programa nga gitawag og Alternative Development Program (ADP) nga gitumong aron hatagan og pinansiyal nga hinabang ang mga lugar nga baniog na kaayo nga tinubdan sa tanom nga marijuana.
Ang lungsod sa Balamban dugay na nga nainila sa pagka-abunda og marijuana nga nakatampo usab sa suliran bahin sa ginadiling drugas dinhi sa nasud.
Tungod niini, aron mabiyaan sa mga mag-uuma ang pagpananom og marijuana, gilusad sa DDB ang ADP aron kahatagan og puhonan ang mga mag-uuma alang sa pagpalambo sa mga tanom nga abaka sa ilang kaumahan.
Gani si Undersecretary Clarence Paul Oaminal sa DDB nagkanayon nga ang DDB migahin og P2 milyones nga ADP fund alang sa mga mag-uuma nga mananom og abaka.
Ang maong pundo anaa karon sa panudlanan sa lungsod sa Balamban ug ang pagpagawas niini mag-agad sa pagbuot ni Mayor Alex Binghay kinsa maoy mopili sa mga mag-uuma nga patamnon og abaka.
Gawas sa Balamban, ang ubang mga lungsod nga hataganan usab sa susamang pundo mao ang Badian ug Dalaguete tungod kay nasayran usab nga may mga kaumahan sa maong mga lugar nga gigamit nga tamnanan og marijuana.
Matud pa ni Oaminal nga panahon na karon aron kagiyahan sa malinawong panginabuhi ang mga mag-uuma sanglit diha sa pagpananom og abaka “malinawon na, makakuwarta pa, itandi sa marijuana, nga makakwarta man apan mapriso sab”, matud pa ni Oaminal.
Sa laing bahin sa adlaw’ng Martes ipahigayon dinhi sa Sugbo ang unang panagtagbo sa tanang mga kadagkuan sa nagkalainlaing ahensya sa kagamhanan nga gitawag nga mga 'stakeholder' sa kampanya batok sa ilegal nga drugas matud pa ni Oaminal.
Midugang si Usec Oaminal nga kining maong panagtagbo sa taga Department of Justice (DOJ) Philippine National Police (PNP) National Bureau of Investigation (NBI) ug Philippine Drug Enforcement Agency (PDEA), maoy una gawas sa Metro Manila.
Sa mao usab nga adlaw, buksan ang tulo ka adlaw nga Regional Consultative Conference nga pagatambongan sa mga representante gikan sa DOJ, PNP, PDEA, ug NBI dinhi gihapon sa dakbayan, matud ni Oaminal. Ang maong komperensya nga matapos sa Huwebes, Abril 23, magtuki sa tanang mga butang nga may labot sa pagsumpo sa ginadiling drugas. (Wen Celen) (BANAT NEWS)