Gitulis sa 'boring'

CEBU, Philippines - Usa ka babayeng giingong nagbaligya sa iyang dungog ang gipangita karon sa kapolisan gumikan sa giingong pakigkunsabo niini sa usa ka modus operandi nga ang biktimahon mao ang iyang kustomer. Usa ka Avie Diago dela Cruz, 28, taga sitio Kagodoy, barangay Basak sa dakbayan sa Lapulapu ang mireklamong gikulata ug gitiunan og kutsilyo sa lalaking gituuhang kapuyo sa babayeng mubo og lupad nga iyang gikuha diha sa usa ka lodging house sa dalan Osmeña Blvd.sa barangay Kalubihan niadtong milabay’ng hapon.

Matud pa ni PO3 Rogelio Caballes nga nahinabi sa Banat News,ang biktima nagkanayon nga ang babayeng suspetsado miduol kaniya ug mitanyag kaniya og lawasnong kalipay nga iyaha usab nauyunan.

Apan dihang padulong na sila saka sa maong lodging house kalit nga mibungat og laing presyo ang babaye hinungdan nga nasuko ang biktima ug nahitabo ang ilang panaglalis ug sa tanto nilang away gihampak sa suspetsadong babaye ang biktima ug usa ka magahing butang. Diha-diha usa ka wala mailhing lalaki nga giingong kapuyo sa babaye ang miduol ug mituok ug mition kaniya og kutsilyo ug mikulata pa gyud niya dayong kuha sa iyang cellphone nga N96.

Mipasidaan si Caballes sa publiko nga di mokumpiyansa sa mga babayeng mugbo og lupad diha sa dalan Colon tungod kay nalambigit sila sa susamang mga modus operandi. (Lesley Caminade)    (BANAT NEWS)