Inayawan landfill i-privatize na - Ferdnandez

CEBU, Philippines - Gitakda nang i-award karong sunod semana ang pagpadumala sa Inayawan Sanitary Landfill sa siyudad sa Sugbu ngadto sa usa ka pribadong kompanya sumala pa ni City Administrator Francisco Fernandez, ang chairman sa Bids and Awards Committee (BAC) sa dakbayan.

Dumalaon na unya ang dumpsite sa FDRcon Company human usab ideklarar sa BAC nga pakyas ang gipahigayong duha ka biddings sa siyudad alang sa pag-privatize sa landfill pipila ka buwan na ang nakalabay.

Matud ni Fernandez nga nahuman na pag-evaluate ang gihulma nga Technical Working Group (TWG) nga nituon sa proposal sa FDR ug gipaabot nga ugma o ba kaha sa adlaw’ng Martes ma-award na kini.

Napanglantawan nga kun ma-privatize na ang landfill makadugang kini sa pundo sa dakbayan nga walay gastos sa habig niini gumikan kay ang kumpanya na ang momentinar ug mohatag og share sa kitaon sa dumpsite human sa lima ka tuig. Nabanhaw ang tinguha sa dakbayan pag-privatize sa landfill human mosilaob ang nahisgutang dapit sa miaging semana nga nakaingon sa pagsakit sa kapin sa usa ka gatos ka mga molupyo sa labing minos tulo ka sitio diha sa barangay Inayawan.

Napawong na hinuon ang aso sulod sa pipila ka mga adlaw apan nadeklarar gyud sa City Council ang landfill nga ubos sa State of Calamity aron mapagawas ang P5 milyones gikan sa calamity fund aron gamiton pagtubag sa environmental ug health hazard sa dumpsite. (Elly Bolonos)    (BANAT NEWS)