Ginang naligsan sa ambulansya

CEBU, Philippines - Patay nang nadangat sa tambalanan ang usa ka ginang human kini madasmagi sa ambulansiya human pagkanaog sa pasaheroang gisakyan diha sa National Highway sa barangay Ocaña dakbayan sa Carcar niadtong miaging gabii.

Ang namatay giila sa kapulisan nga si Catalina Saranillo, 56, taga barangay Banhigan lungsod sa Badian human makaangkon og grabeng kadaot sa nagkadaiyang parte sa lawas dihang nadasmagan sa ambulansya nga gipanag-iya sa lungsod sa Dalaguete nga gimaneho ni Michael Angelo Ambrad, 22, taga barangay Poblacion, Dalaguete.

Si PO3 Jovel Bacarisas sa Carcar Police Station nga gikahinabi sa Banat News nagkanayon nga ang ambulansya nagdala'g pasyente paingon dinhi sa dakbayan sa Sugbu.

Dihang naabot sa dapit, ang biktimang si Saranillo gikatahong sakay sa de-pasaheroang multicab ug kalit lang nanaog ug milabang sa dalan hinungdan nga nadasmagan sa naghaguros nga ambulansya.

Ang biktimang si Saranillo gidali sa pagdala sa driver ra usab sa maong ambulansiya sa Carcar District Hospital apan gideklarar kining dead-on-arrival gumikan sa mga naangkong kadaot sa kalawasan.

Matud pa ni PO3 Bacarisas nga ang driver nga si Ambrad gibuhian ra gihapon kagahapon sa alas 11:50 sa buntag human usab ang mga representante sa kagamhanan sa Dalaguete ug mga kabanay sa namatay nagkasabot nga dili nalang mopasaka og kaso.

Apan giingong mipasalig ang lungsod nga maoy moabaga sa galastuhan sa namatay ug uban pang bayrunon. (BANAT NEWS)