CEBU, Philippines - Hayan mapasakaan og kasong obstruction of justice si SPO1 Cilas Ceballo ang hepe sa traffic division sa lungsod sa Compostela nga igsuon sa gi-ambush nga engineer human gikatahong maoy mihatag og pagtugot sa kapulisan sa Consolacion nga kuhaon nalang ang patay'ng lawas diha sa crime scene.
Ang maong polis igsuon ni Engr. Malequias Ceballo nga gi-ambush niadtong miaging buntag sa barangay Pitogo lungsod sa Consolacion.
Si Supt. Erson Digal, deputy provincial director for administration sa Cebu Provincial Police nagkanayon nga gitugutan ni SPO1 Ceballo nga kuhaon ang lawas sa igsuon bisan wala pa maabot ang mga sakop sa Scene of the Crime Office (SOCO-7).
Matud pang Digal nga naguba ang crime scene tungod sa gihimo ni Ceballo imbes nga mapreserbar kini aron makakuha og mga ebidensya ang mga imbestigador nga makatabang sa pagsubay sa insidente.
Gimanduan na ni Digal si Sr. Insp. Jose Elmer Fernandez, hepe sa kapulisan sa Consolacion nga apilon pag-imbestigar si SPO1 Ceballo tungod sa maong insidente.
Gikatahong ang rason nga kahuot sa trapiko tungod sa nalimbuwad nga sakyanan sa biktima diha sa dalan dili paigo aron gub-on ang crime scene tungod kay dunay mga polis nga mahimong mo-manage sa dagan sa mga sakyanan.
Ang Criminal Investigation and Detection Group (CIDG-7) mipadayag na usab nga motabang sa imbestigasyon nga dunay teknikal nga kaalam sama sa pagkuha og mga ebidensya, pag-retrieve sa mensahe sa cellphone sa biktima ug uban pa.
Ang kapolisan wala pay lead sa ilang imbestigasyon apan ilaha nang gisusi ang mga anggulo nga may kalambigitan sa babaye; away sa iyang igsuon; panag-ilog sa yuta ingon man sa trabaho sa biktima.
Samtang si SPO1 Ceballo ug ig-agaw'ng si SPO2 Ramon Perales boluntaryong nagpa-paraffin test kagahapong adlawa diha sa PNP Crime Laboratory 7 ingon man pagpaubos sa ballistic test sa ilang mga armas, kini aron paglimpyo sa ilang mga pangalan sa maong krimen.
Ang duha parehong misang-at og kaso kaniadto sa biktima og kasong illegal posession of firearms ug gisumbalik usab og reklamo sa biktima ngadto sa Ombudsman ang maong mga polis.
Gipanghimakak hinuon niini nga misugot siya sa hangyo sa kapolisan sa Consolacion nga ipakuha na ang patay'ng lawas sa biktima bisan og wala pa ang SOCO sa crime scene nga nakaingon sa kataas na sa kutay sa nabarang mga motorista sa dalan.
Matud pa niya dihang nag-abot abot na ang mga sakop sa media ug nanginterbyu kaniya wala na siya masayod sa sunod nga nahitabo tungod kay gi-cordon na ang palibot ug diha nalang niya mahibaw-ing gikuha na ang patay'ng lawas sa iyang igsuon.
Samtang si Sr. Insp. Fernandez nga gihinabi sa Banat News nagkanayon nga wala pay bisan usa ka testigo nga miduol kanila apan duna na silay gamay'ng nakitang posibleng lead sa pagkatawo sa mga suspek ug gisusi na ang koneksyon niini sa mga ebidensyang nakuha diha sa crime scene.
Si Engr. Ceballo nagmaneho sa iyang pickup dihang gibabagan og tulo ka wala mailhing lalaking nagmotor ug mipaulan kaniya og bala hinungdan sa pagkalimbuwad sa iyang sakyanan ug nakabsan kini sa kinabuhi. – BANAT NEWS