2-anyos naligsan, patay

CEBU, Philippines - Patay ang usa ka 2 anyos nga batang lalaki human maligsi og bus de pasaheroan human napasagdan sa nagbantay ug milabang sa karsada didto sa kurbadahon ug dulhogon nga bahin sa barangay Calumpang, lungsod sa Oslob niadtong Huwebes sa alas 12:30 sa udto.

Ang biktima nga namatay sa dalan samtang paingon unta kini ihatod sa tambalanan dinhi sa dakbayan sa Sugbo mao si Scott Allan Sormeon, 2, nagpuyo sa nahisgutang lugar, samtang ang drayber sa Sunrays Bus Liner nga nakaligis kaniya dunay plaka nga GWD-522 mao si Michael Denolang, 35 anyos, minyo ug molupyo sa Poblacion Samboan.

Matud ni PO1 Rey Angelo Agustin sa Oslob Police Station sa dihang nahinabi sa Banat News subay sa blotter nga gibasehan niini ang bus gikan sa lungsod sa Samboan ug paingon sa siyudad sa Sugbo apan pag-abot sa maong kurbadahon nga lugar kalit lang milabang sa karsada ang biktima nga gipasagdang nagduwaduwa daplin sa karsada.

Subay sa gihimong pagsukitsukit sa kapolisan sa drayber gisuwayan pa unta niya kini og lihay apan wala na gyud madala pa u g nadasmagan gyud ang biktima ug iya dayon kining gihunongan dayong gitabang ang biktima ug gidala sa Oslob District Hospital ug tungod sa seryoso nga kahimtang girekomendar kini nga ihatod dayon sa tambalanan dinhi sa siyudad sa Sugbo human makaangkon og grabeng kadaot sa iyang kalawasan apil na sa ulo nga nabundak sa semento nga karsada.

Matud ni POI Agustin nga samtang paingon nga ihatod sa tambalanan dinhi sa dakbayan ang biktima   namatay gyud kini paghiabot pa lang didto sa lungsod sa Argao hinungdan nga gibalik na lang kini sa ilang pinuy-anan.

Ang drayber sa bus boluntaryo usab dayong mitahan sa iyang kaugalingon ug nagtingkagol na karon sa detention cell samtang nagpaabot sa tukmang kaso nga ipasaka batok niya. - Darrel A. Carumba (BANAT NEWS)