Tresurera sa Pasil gitangtang na

CEBU, Philippines - Gitangtang na sa katungdanan ang barangay treasurer sa Pasil ning dakbayan sa Sugbu nga si Maria Corazon Veloso.

Kini human ipatuman kagahapong adlawa sa Department of Interior and Local Government (DILG) sa siyudad ang kamanduan sa Ombudsman Visayas.

Gipatangtang sa anti-graft office si Veloso sa pwesto human masuta nga ang barangay treasurer nagpabaya sa iyang katungdanan tungod sa kapakyas paglista sa income sa barangay water refilling station ngadto sa barangay records.

Ang kantidad nga wala malista sa barangay treasurer ug wala usab ma-isyuhi og resibo giingong mosumada og dul-an sa usa ka milyon ka pesos.

Una nang gipadayag ni Kapitan Romeo Ocarol sa Pasil nga wala ibulsa ni Veloso ang kwarta ug ang sipyat niini mao lang ang accounting procedure.

Duna na hinuoy girekomendar si Ocarol nga ihulip sa ilang treasurer nga nag-alagad sa barangay sukad pa niadtong tuig 1997.

Apan nagdumili una pagbutyag ang kapitan sa pangalan niini samtang ipahigayon pa ang special session sa barangay kagahapon sa hapon.

Nasayran sa Banat News nga gisugdan na pag-uli ni Veloso ang mga butang nga iyang gihuptan sama sa mga resibo ug uban pa.

Ang maong kalamboan gikalipay ni kanhi Kagawad Almario Bitang nga maoy misang-at og reklamo ngadto sa Ombudsman Visayas uban kang Kagawad Ranulfo Abejo.

Uban kang Veloso nga gireklamo ni Bitang mao mismo si Ocarol, apan ang kapitan naabswelto sa asunto tungod kay nasublian sa katungdanan sa nakalabay nga piniliay.

Gipaabot nga karong adlawa, pormal nang molingkod sa katungdanan ang bag-ong barangay treasurer sa Pasil hulip kang Veloso. – BANAT NEWS