CEBU, Philippines - Usa ka 65 anyos nga ginang gituohang namatay tungod sa sakit nga meningococcemia didto sa barangay Luyang, lungsod sa Carmen niadtong Lunes sa gabii nga nakapahadlok sa mga silingan sa maong pasyente bisan pa man og gipalubong dayon ang biktima niadtong Martes sa hapon.
Ang namatay nga pasyente sa sakit nga meningococcemia mao si Amecia Hermoso, 65, minyo, nagpuyo sa nahisgotang lugar.
Matud ni Camia Villamor, nurse sa municipal clinic sa Carmen sa dihang nahinabi sa Banat News nga dugay nang nasakit ang biktima apan wala gyud kini patambali ug gipasagdan lang diha sa ilang balay sa mga kabanay niini hangtod nga naluya kini ug namatikdan niadtong Lunes nga nanglagum na ang kalawasan niini ug dunay sagol nga rushes nga kolor puwa sa kalawasan niini una pa nila kini gideretso og dala sa Vicente Sotto Memorial Medical Center (VSMMC) dinhi sa dakbayan sa Sugbo.
Apan matud ni Villamor namatay dayon kini wala magdugay nianang pagkagabii sa paghiabot niini sa maong tambalanan nianang pagkahapon ug gituohan sa mga doktor nga sakit nga meningococcemia ang gikamatyan niini.
Matud ni Villamor gipalubong dayon nianang pagka-Martes sa hapon ang patay'ng lawas sa biktimia tungod sa kahadlok nga makatakod kini sa mga molupyo sa maong lugar.
Ang municipal health officer nga si Dr. Elmer Batao sa lungsod sa Carmen mipadala dayon og mga health officer aron mohatrag og mga tambal sa mga kabanay sa maong pasyente nga ipa-inom isip proteksiyon aron dili matakdan sa maong sakit.
Gawas niini gimando pa usab ni Batao ang pagpa-spray sa tibuok panimalay sa pamilyang Hermoso aron gyud pagsiguro nga mamatay ang kagaw ug dili na kini makatakod pa og laing tawo.
Gitug-an ni Villamor nga pagkakaron nagpanghadlok na ang mga silingan sa pamilyang Hermoso nga mopaduol sa mga paryente niini ilabi kun mogawas sa ilang balay sa kahadlok nga matakdan sa maong sakit.
Samtang gipadayag ni Department of Health (DOH-7) director Susana Maderieta sa dihang nahinabi sa Banat News nga nakadawat sila sa maong report apan giklaro niya nga lisod na nga makompirmar pa kun meningococcemia ba gyud ang sakit nga gikamatyan sa maong ginang tungod kay gilubong na kini dayon ug gawas pa wala usay mga blood sample ug uban pa nga nakuha aron unta kini mahiling.
Matud ni Maderieta nga sa gihimo nilang pakisusi grabe na ang maong sakit sa pasyente ug namatay kini sulod lang sa 5 minutos sukad sa paghiabot niini sa VSMMC niadtong Lunes hinungdan nga wala na makuhai pa og blood sample.
Apan matud ni Maderieta nga iya nang gimanduan ang health officer sa Carmen pagpa-inom og tambal sa mga kabanay sa maong pasyente aron dili kini matakdan sa maong sakit kun ugaling mingococcemia man kini.
Gitug-an ni Maderieta nga subay sa ilang rekord nga matag tuig duna gyuy tulo ngadto sa lima ka mga kaso sa sakit nga meningococcemia ang matala dinhi sa Central Visayas apan gihulagway niya kini nga dili alarming. – BANAT NEWS