CEBU, Philippines - Napalgang nagbitay sa dakong sanga sa punoan sa nangka ang patay'ng lawas sa usa ka tawong gituohang naghikog pinaagi sa paghigot og pisi nga nylon sa iyang liog alas 5 pasado ang takna sa buntag niadtong miaging adlaw sa Hillside Subdivision sa barangay Pagsabungan, dakbayan sa Mandaue. Giila ang lalaki mao si Ronaldo Alonsabe, lumad nga taga Calatraba, Negros Oriental ug nagtrabaho isip master baker sa usa ka bakery sa maong dapit.
Si SPO1 Aian Quitayen sa operation section sa Mandaue City Police Office (MCPO) nga nahinabi sa Banat News miingon nga ang mga kauban sa trabaho ni Alonsabe nga sila si Coney Reyes, 17, ug Miguel Lacet, 44, maoy unang nakakaplag sa patay'ng lawas niini.
Dugang pa niya nga sa gihimong imbestigasyon sa mga sakop sa homicide section, giingong daan na nga namatikdang magul-anon kini sukad nga gibuwagan sa hinigugma pipila na ka adlaw ang nakalabay. Ang patay'ng lawas ni Alonsabe gikatakdang ipaubos sa autopsy aron masuta kun may foul play ba ang kamatayon niini. - Romeo Limpangog (BANAT NEWS)