Paggamit sa govt. vehicles ipa-ban
CEBU, Philippines - Nanawagan ang mga sakop sa Hunta Probinsyal sa Sugbu ngadto sa mga opisyales sa Local Government Unit (LGU's) nga i-ban ang paggamit sa mga service vehicles sa gobiyerno sa dili oras sa tingtrabaho.
Sumala pa ni board member Victor Maambong ug board member Benjun Mondigo nga ang government vehicles dili angay gamiton panahon sa Sabado, Domingo ug mga holidays kini tungod kay supak kini sa balaod.
Hinuon gipasabot ni Maambong ug Mondigo nga magamit lang ang mga government vehicles sa adlaw’ng Sabado ug Domingo ingon man holidays kung dunay mga emergencies.
Niining paagiha nagkanayon ang duha ka bokal nga maka-save na ang gobiyerno sa balayranan sa gasolina kung hingpit nang i-ban ang paggamit sa mga sakyanan sa gobiyerno.
Nasayran nga daghan nang mga opisyal sa gobiyerno ang nasakpan sa mga sakop sa Task Force Oplan Red Plate nga gituyo'g umol sa Ombudsman Visayas kinsa nag-atubang na karon og imbestigasyon human masakping nigamit og sakyanan sa gobiyerno bisan sa adlaw’ng Sabado ug Domingo ingon man holidays.
Nunot niini nanawagan sa publiko sila si Maambong ug Mondigo nga magpakabana ug mosumbong gilayon sa hingtungdang ahensya sa gobiyerno kung dunay makit-an magdala og sakyanan nga isyu sa gobiyerno niining mga adlawa aron ma-imbestigahan ug mapahamtangan og tukmang silot. - Rey Pasaporte (BANAT NEWS)
- Latest
- Trending
