Public hearing sa truck ban karon

CEBU, Philippines - Ang mga sakop sa committee on transportation sa konseho sa dakbayan sa Mandaue mopahigayon og public hearing karong buntag alang sa paghingpit sa giduso nga ordinansa nga naglatid og mga oras alang sa pag-agi sa kadalanan sa dakbayan sa mga delivery nga sakyanan.

Si Konsehal Emiliano Rosal nga maoy chairman sa committee on transportation sa konseho sa dakbayan maoy mangulo sa pagahimuong public hearing ug tambongan usab sa mga dinapit nga negosyante ug mga nagkadaiyang kahugpongan sa mga drayber sa sakyanan.

Sa pagpakighinabi sa Banat News kang Rosal apil sa gidapit mao ang taga lungsod sa Consolacion, dakbayan sa Lapulapu ug Mandaue Chamber of Commerce and Industry (MCCI) ug mga drayber.

Si Domingo Cortes sa Traffic Enforcement Agency of Mandaue (TEAM) nga nahinabi sa Banat News nagkanayon nga kini subay sa rekomendasyon sa Traffic Board nga maoy mitan-aw sa resulta sa dry run nga gipahigayon.

Samtang si Mayor Jonas Cortes mitug-an sa Banat News nga dako ang kausaban sa kahimtang sa dagan sa trapiko ang nakita atol sa dry run nga nagdili sa mga delivery trucks nga makaagi sa mga dagkong karsada sa dakbayan sugod alas 6 sa buntag hangtod sa alas 8 ug alas 4 sa hapon hangtod sa alas 8 sa gabii. - Romeo Limpango (BANAT NEWS)

Show comments