Sta. Fe officials mokiha sab sa organizer sa 'malaw-ay'ng' show

CEBU, Philippines - Laing kaso ang atubangon batok sa tigpasiugda sa bikini open nga gipahigayon niadtong Sabado Santo didto sa Rommel Beach resort sa lungsod sa Sta. Fe Isla sa Bantayan Island.

Kini human ang mga opisyales sa lungsod sa Sta. Fe mopasakag kaso batok ni Elton Tio ug mga kaubanan niini, usa ka adlaw human usab makapasaka og kaso ang lalawigan sa Sugbu.

Si Konsehal Roger Illustrisimo mibutyag nga ang kapakyas paglukat og permit ni Tio sa iyang show ang ilang ipasaka batok kaniya ug ingon man sa kalapasan niini sa Municipal Ordinance nga ilang gituyo pagmugna batok sa mga malaw-ay’ng palabas atol sa Semana Santa.

Si Gobernador Gwendolyn Garcia pagkasayod niini mipadayag sa iyang paghangop sa inisyatiba sa lungsod.

“Nalipay ko ana inyong (Sta.Fe officials) hukom, we on are the same direction,” pagbutyag pang Garcia.

Nunot niini, gimanduan gilayon ni Garcia ang provincial legal officer sa paghan-ay sa ilang complaint batok kang Tio ug mga kaubang organizers niini.

“Mas maayong mahuman na karung hapon ang complaint aron atong masang-at ang kaso, kay lisod na pod kaayo kun ato pa silang pabalikon ugma silang mga opisyal aron lang pag-file sa kaso.

Nagpatabang usab ang gobernador sa hepe sa Sta. Fe Police station, Sr. Insp. Rolando Evalle ug sa mga opisyal sa lungsod pag-ila sa mga kaubanang organizers ni Tio ug ang mga sponsors aron ilang maapil sa pagpasakag kaso.

“Sayod ko nga daghang mobarog nga mga testigos didto sa Sta. Fe unsay ilang gihimo niadtoang gabhiona,” matud pang Garcia.

Gihatagan og tagal sa gobernador ang kapolisan ug mga opisyal sa Sta. Fe kutob karung Biyernes sa pag-ila ug pagpanguha og dugang testigos aron unya inig balik niya karung Lunes gikan sa laing nasud pormal na silang makuhaan og mga affidavit.

Si Supt. Erson Digal, ang commander sa Task Force Igmat mipasalig nga motabang sa gipangayo ni Garcia lakip na p ang agpahibawo sa tanang hepe sa kalungsoran sa Executive Order nga mao ang Women development Code of Cebu Province karung Abril 17-18 sa ilang Spiritual Leadership Seminar diha sa Police Regional Office-7. - Rey Pasaporte (BANAT NEWS)