CEBU, Philippines - Mibawos karon paghagit ang Urban Poor Consultant sa Cebu City Hall nga si Gerry Marquez ngadto sa hepe sa demolition team sa siyudad nga si Vicente Mercado.
Ang urban poor consultant nakigkita ning tagsulat tungod kay giingong siya wala makauyon sa giluwatang pamahayag ni Mercado nga napatik sa Banat News kagahapon.
Matud ni Marquez nga dili lang siya ang angayang moluwat sa katungdanan kung mapamatud-an nga siya maoy nakaingon sa nagkadaghang sidewalk vendors sa dakbayan.
Buot sa urban poor consultant nga moluwat usab sa katungdanan si Mercado kung kini mapakyas pagpakita og ebidensya sa gipasangil niini kaniya.
Una nang gipadayag ni Mercado nga si Marquez maoy mihatag og pagtugot sa ubang mga street vendors hinungdan nga kini giingong daw uhong nang nanurok sa siyudad.
Butang nga kusganong gihimakak ni Marquez uban sa pagsumbalik og hagit kang Mercado nga pamatud-an niini ang maong pasangil.
“Pahinganla siya og mga dalan sa dakbayan nga akong gipabutangan og mga vendors, ipatumbok niya kung kinsa ning maong mga vendors,” sumala ni Marquez.
Apan daling gihinganlan ni Mercado ang Osmeña Boulevard, Manalili, D. Jakosalem ug uban pang nagkatag ang mga manindahay nga gihatagan og pagtugot ni Marquez.
Kini giingong base usab sa gihimong mga clearing operations sa mga sakop ni Mercado nga modala sa pangalan ni Marquez aron dili mapapahawa sa puwesto.
Gidawat ni Mercado ang hagit sa urban poor consultant tungod kay giingong duna siya’y gihuptan nga mga ebidensya sa iyang giluwatan.
Taliwa niini, andam hinuong makig-uli si Mercado ngadto kang Marquez ug ang nauwahi gitanyagan sa nahauna nga himuon niining operations officer.
Butang nga dali usab nga gisalikway ni Marquez tungod kay ang maong posisyon gihulagway niini nga mas ubos kay sa iyang gihuptan nga katungdanan.
“Iya kong i-demote? Consultant gud ko, bisan pa og akoy ipuli sa iyang posisyon dili ko interesado,” nagkanayon si Marquez.
Gitataw ni Marquez nga wala siya’y personal nga kayugot kang Mercado kun dili ngadto lang sa mga sakop niini nga giingong maoy tig-sulsol sa hepe sa demolition team. - Elly Bolonos (BANAT NEWS)