CEBU, Philippines - Padayong gipanid-an sa Cebu Coastguard ang posibleng oil spill sa kadagatan sa Maslog siyudad sa Danao ug mga silingang lugar human sa pagkalunod sa tanker nga Golden Rose niadtong Martes sa hapon.
Ang tigpamaba sa Coastguard district Eastern and Central Visayas Commander Anelito Gabisan dihang nahinabi sa Banat News nga kumpiyansa hinuon silang di kini makamugna og kadaut sa kadagatan tungod kay wala man kini kargang petrolyo. Matud pang Gabisan, 200 litros ra ang gitubil nga krudo sa nalunod nga tanker nga gibanabanang igo ra unta nga makaabot sa Danao diin kini i-dry dock gikan sa FF Cruz sa Mandaue Wharf.
Gihulagway ni Gabisan nga posibleng nakonsumo na ang katunga niini ug ang nahabilin gamay nalang kaayo ug daku usab ang posibilidad nga na-evaporate na kini tungod usab sa kainit karun sa panahon.
Apan bisan paman niini gipasalig ni Gabisan nga walay hunong ug padayun ang ilang pagsusi sa lugar nga nalunoran.
Dunay gibutang nga five-man team nga maoy gitahasan paghimo og pakisusi sa kadagatan sa Maslog ilabina ang lugar sa direksyon sa sulog sa dagat diin adto posible anuron ang krudo gikan sa barko. Matud pa ni Gabisan mokuha sab sila og water sample sa dagat aron pagsuta kun wala bay nasagol nga krudo nga timailhang dunay oil spill aron gyud masigurong luwas ang maong lugar.
Ang pormal report gikan sa maong team maoy basehan unya sa Coastguard sa mga lakang nga ilang himuon lakip na unya ang pagpatabang sa Department of Environment and Natural Resources kun gikinahanglan.
Sa paghimo ning balita, gipaabot pa usab nga makaduso og marine protest ang kapitan sa nalunod nga tanker nga si Arthur Yap aron maoy basehan alang sa pormal nga pagsugod sa imbestigasyon sa maong panghitabo. - Darrel Carumba (BANAT NEWS)