1 angol sa ambush

CEBU, Philippines - Usa ang naangol sa usa ka pamilyahang gikatahong gi-ambusan sa bukirang bahin sa barangay Libjo lungsod sa Ronda niadtong Lunes sa alas 4:00 sa hapon.

Ang biktima nga naangol mao si Eugene Montefalcon, 20, molupyo sa barangay Tupas sakop sa maong lungsod samtang ang mga kauban niya mao ang iyang inahan nga si Marissa Montefalcon ug manghod nga si Christian Montefalcon.

Samtang ang suspek mao si Eugene Menoza, nagpuyo ra usab sa nahisgutang lugar.

Matud pa ni Insp. Milo Dagasdas sa Ronda Police dihang nahinabi sa Banat News subay sa inisyal nilang imbestigasyon nagsakay og habal habal nga motor ang mga biktima gikan nga nanabo sa lungsod paingon na untang mopauli sa ilang balay.

Apan pag-abot niini sa mingaw nga lugar kalit lang kining nakadungog og sunod sunod nga mga buto sa armas ug maayo nalang gani kay nakahimo pa sa pagpasirit pahilayo sa lugar ang drayber ug igo lang nakaangkon og bugtong samad pinusilan sa walang bukton ang biktima nga si Eugene.

Sa pag-responde sa mga polis sa crime scene nahabilin ang usa ka motorsiklo nga Honda XRM kolor blue nga dunay plaka nga 2421 nga gituohang maoy gisakyan sa suspek ug gibiyaan pagsibat niini.

Gituohan sa kapulisan nga personal nga panagdumot tali sa biktima nga si Eugene ug sa suspek ang motibo sa maong pagpamanhig. – BANAT NEWS