Tigpatigbakay sa Talamban usa ka BIN?

CEBU, Philippines - Susihon sa kapulisan sa dakbayan sa Sugbu ang report nga ang negosyanteng si Rico Dionson kinsa gipasanginlang tigpasiugda'g tigbakayan diha sa barangay Talamban usa sa mga sakop sa Barangay Intelligence Network (BIN) sa Cebu City Police Office.

Ang direktor sa Cebu City Police Office, Sr. Supt. Patrocinio Comendador nagkanayon nga gisusi na sa iyang mga sakop ang ilang records kun tinuod ba kini.

Gipadayag ni Comendador nga kun ugaling masutang BIN nila si Dionson ilaha kining tangtangon tungod kay usa sa requirements nga wala sila malambigit sa mga ilegal nga kalihukan.

Sumala pa niini nga walay personalan ang ilang gihimo ngadto sa maong negosyante kun dili igo lang silang miaksyon sa kapulisan gumikan sa reklamo sa mga residente ingon man sa barangay officials nga nagpadayon ang tigbakayan bisan walay permit.

Subay niini, ang isyu may kalambigitan sa gikatahong pagpanghatag og litson ni Dionson sa mga higalang polis sa CCPO pagbuot niya kini ug wala magpasabot nga magalungan na niini ang kapulisan.

Giklaro usab niini nga dili lang usab unang higayon nga gisunog sa kapulisan ang mga ruwedahan sa mga tigbakayan dinhi sa dakbayan nga walay permit tungod kay sa mga nangaging tuig duna nay gipangsunog ang mga raiding team apan wala kini approval gikan kaniya.

Hinuon alang kaniya nga judgement call nalang kini sa mga police nga nironda tungod kay kun dili usab nila sunogon paglabay sa pipila ka adlaw gamiton na usab kini sa mga sugarol.

Ang kapulisan sa dakbayan sa Sugbu nanghingusog sa pagkuha'g mga ebidensya batok kang Dionson alang sa kasong ilang isang-at.

Hinuon ang lakang sa kapulisan gihangop ni Dionson ug andam usab nga moatubang ang maong negosyante tungod kay hugot nga gibarugan niini nga wala siya mopasiugda sa maong tigbakayan. – BANAT NEWS