CEBU, Philippines - Gihugon-hugunan nga suportahan sa mga Muslim leaders dinhi sa Sugbu ang pagdagan si Pampanga Gov. Edie Panlilio kinsa nagtinguhang modagan pagkapresidente sa nasud sa umaabot nga election sa tuig 2010.
Ang pangulo sa Office on Muslim Affairs dinhi sa siyudad sa Sugbu nga si Ustadz Najib Rasul nagkanayon nga silang mga Muslim nagpadayon sa pangita og mga leaders nga dili kurakot, sinsero sa kausaban sa nasud ug kandidato nga may moralidad ug usa na niini mao si Panlilio.
Kini tungod kay ang moralidad sa mga Muslim ilabi na sa Mindanao naapektohan na pag-ayo niining mga politiko nga nagdala og dili maayong sistema sa pangagamhanan sa nasud.
Si Panlilio pari sa Simbahang Katoliko apan mikandidato kini pagka-gobernador sa maong lalawigan ug midaog.
Gipasabot niini nga wala nila gi-igsapayan ang pagkapari ni Panlilio tungod kay nakita nila ang mga islamic values sa pagkatawo ni Panlilio.
Matud pa niini nga sa ilang paghashas karon sa mga kandidato sa pagkapresidente, wala sila magtan-aw sa relihiyon apan kadtong mga kandidato nga tinuod nga mosunod sa balaod sa Ginoo ug balaod sa yuta.
Gitataw hinuon niini nga ang ilang hingpit nga desisyon mag-agad unya sa ilang konsultasyon sa kinatibuk-ang grupo ug sa desisyon ni Panlilio kun mopadayon ba gyud sa pagdagan sa pagkapresidente ang gobernador sa Pampanga. – BANAT NEWS