Tanker nalunod sa Danao

CEBU, Philippines - Nalunod ang usa ka motortanker nga Golden Rose nga gipanag-iya sa Rose Shipping Lines sa kadagatan sa barangay Maslog siyudad sa Danao human mabuslot ang engine room niini ala una pasado kagahapon sa hapon.

Si Commander Anelito Gabisan, public information officer sa Coast Guard District Central and Eastern Visayas mibutyag sa dihang nahinabi sa Banat News nga gikan sa F.F. Cruz sa siyudad sa Mandaue ang maong motortanker ug paingon unta kini sa siyudad sa Danao alang sa drydocking.

Apan pag-abot sa kadagatan sa maong lugar kalit lang nabuslot ang engine room niini nga miresulta sa pagsulod sa tubig hinungdan nga mitakilid ang maong barko ug dali dayong nimando og abandonship ang kapitan nga si Arthur Yap.

Matud ni Gabisan insaktong alas 2:15 sa hapon hingpit na gyud nga nalunod ang maong barko ug luwas hinuon ang walo ka mga tripulante apil na ang kapitan human milusad og dinaliang rescue operation.

Matud ni Gabisan gibanabanang modistansiya lang og oras nadawat nila ang alarma ug human maluwas ang tanang tripulante hingpit usab nga nalunod ang maong barko nga hinayhinay nga mitakilid human mapuno sa tubig nga misulod sa nabuslot nga engine room.

Gidugang ni Gabisan nga dali usab dayon silang mipadala sa ilang mga sakop sa Environmental protection Unit aron pag-obserbar og pag-assist sa posibleng oil spill nga mahitabo nunot sa pagkalunod sa maong motortanker.

Usa ka Benni Rose Sacres ang gikatahong nanag-iya sa Rose Shipping Lines diin masakop ang maong motortanker nga nalunod.

Samtang gipadayag ni Engr. William Coñado, hepe sa Environmental Impact Assessment sa Environmental Management Bureau-7 mibutyag sa dihang nahinabi sa Banat News nga mopadala sila og sakop aron mosusi sa nahitabo-an nga pagkalunod sa motor tanker sa gibanabanang 3.5 nautical miles gikan sa Maslog, Danao.

Hinuon gibutyag ni Conado nga sa kasamtangan ang Philippine Navy ingon man ang Coast Guard mao ang dunay hurisdiksyon pagmonitor sa posibling oil spill ug anha pa mosulod ang ilang buhatan sa higayon nga modako ang epekto sa oil spill alang sa rehabilitasyon sa kadaot nga namugna ug gukdon ang mga kompaniya nga tag-iya sa nalunod nga barko nga responsable niini.

Gidugang niya nga wala pa sila makadawat og opisyal nga report may labot sa pagkalunod sa maong motortanker apan bisan pa niini mohimo dayun sila og pakisusi human mapahibawo sa Banat News.

Sa paghimo ning balita gi-finalize pa sa Cebu Coast Guard ang ilang report ingon man ang pagkuha sa kumpletong mga pangalan sa mga naluwas nga tripulante ingon man mapahigayon usab sila og pormal nga imbestigasyon.

Ang kadaghanan sa mga tripulante anaa kasamtangang gidunggo sa kapulisan sa lungsod sa Compostela nga apil usab sa miresponde sa maong panghitabo. – BANAT NEWS