CEBU, Philippines - Naputos sa bun-og ang usa ka karnaper og motorsiklo human kini masikop sa tag-iya didto sa Brgy. Ibabao dakbayan sa Mandaue sa milabay’ng gabii.
Ang nasikop mao si Julito Basalo, 30, minyo nga taga Sitio Tabucanal, Brgy. Pardo dakdayan sa Sugbu ug usa ka habal-habal driver.
Ang tag-iya sa motorsiklo nga si Alexis Juanir, 51, minyo, nga taga Sitio Tribunal, Brgy. Centro dakbayan sa Mandaue mibutyag sa kapolisan nga nakit-an niya sa akto si Basalo nga mikuha sa iyang motor nga giparking sa parkinganan sa usa ka tindahan.
Sa dihang gipadagan na ni Basalo ang motor, kalit kining gibunalan ni Juanir busa mikirig ang maong karnaper unya ang nakabantay nga standby, milihok ug gitabangan og kulata si Basalo. (Bong Soriano) (BANAT NEWS)