Sikyu gipusil sa nagmotor tipi

CEBU, Philippines - Duha ka tawo ang nabiktima sa pagpamusil sa amihanang bahin sa Sugbu sa managlahing lugar niadtong Sabado sa kaadlawon ug Biyernes sa hapon.

Ulahing insidente sa pagpamusil nahitabo sa barangay Masaba, dakbayan sa Danao niadtong Sabado sa kaadlawon diin usa ka Ali Maximo Canoog Casino Jr., 29, usa ka security guard ug residente sa sitio Kulo, barangay Kahumay-humayan sa nahisgutang siyudad ang gipusil sa duha ka wala mailhing lalaking nagmotorsiklo.

Si Casino ang nakaangkon og usa ka samad pinusilan sa ulo nga gituohang maoy hinungdan sa iyang kamatayon.

Si PO3 Dominic Tampus, duty desk officer sa Danao City Police Station sa pakighinabi niini sa Banat News nagkanayon nga si Casino uban kang Junme Barbero miangkas sa motorsiklo nga gimaneho ni Christopher John Alcoy Durano gikan sa barangay Poblacion Proper paingon nang mopauli.

Pag-abot sa sitio Manghulaw, barangay Masaba, duha ka motorsiklong dunay mga angkas ang kalit lang mi-overtake kanila ug ang usa sa mga angkas ang mipusil sa biktima ug dayon miikyas.

Ang kapolisan   mipahigayon og follow-up nga imbestigasyon sa maong insidente ug pagtino sa motibo ug pag-ila sa mga mamumuno. – BANAT NEWS