Kamatayon ni Frostrom gikasubo sa Lapu'

CEBU, Philippines - Gikasubo sa mga opisyales sa kagamhanang lokal sa dakbayan sa Lapulapu ang kamatayon ni Presidential Management Staff undersecretary Malou Frostrom nga apil sa nahagsang presidential helicopter sa Northern Luzon sa milabay'ng semana.

Matud pa ni Lapulapu City Vice Mayor Mario Amores nawad-an og usa ka lig-ong higala ug matinabangong tawo ang dakbayan sa Lapulapu.

Sumala pa ni Amores sa matag higayon nga aduna sila'y ihangyo ni Presidente Gloria Macapagal Arroyo, dako og papel sa katumanan niini si Frostrom.

Sa text message nga nadawat sa Banat News gikan sa buhatan ni Press Secretary Cerge Remonde, gipahibalo niining ang abo sa patay'ng lawas ni Frostrom miabot na dinhi sa Sugbu ug gikatakdang ilubong sa Mactan Memorial Gardens sa Marigondon dakbayan sa Lapulapu sa umaabot Martes.

Ang urna nga gibutangan sa abo ni Frostrom anaa karon sa Malacañang sa Sugbu sukad kagahapon ug hangtod karong adlawa alang sa pagduaw sa iyang mga kahigalaan ug kaparyentehan nga buot motan-aw sa katapusang higayon kang Frostrom. – BANAT NEWS