CEBU, Philippines - Patay diha-diha ang usa ka lalaki human giulo pagpusil sa usa ka lalaki pasado alas singko sa kabuntagon sa miaging adlaw sa barangay Kamagahan lungsod sa San Remegio.
Si Narciso Sinugbuhan Muñez, 34, lumad nga taga sitio Cacao barangay Canluhangon lungsod sa Tabuelan gidul-itan pagpusil sa giilang si Jolito Sibay, lumulopyo sa nahisgutang lugar.
Sa pasiunang imbestigasyon sa kapolisan nasayran nga ang biktima kalit giduol sa suspetsado ug walay daghang pangutana gidiretso og pusil sa ulo hinungdan sa iyang hinanaling kamatayon.
Ang kapolisan nagpahigayon og hot pursuit operation sa suspetsado apan wala na kini igkita.
Laing napusilan sa ulo mao ang usa ka mag-uumang gidul-itan pagpusil sa iyang silingan pasado alas 6 sa buntag sa miaging adlaw sa barangay Duangin lungsod sa Balamban.
Si Mario Aliser, 68, gipusil sa pag-umangkong si Nestor Aliser gumikan sa kasuko sa naulahi nga gibadlong nga di patugwayan sa iyang hayop ang luna sa biktima.
Sa imbestigasyon sa kapolisan base sa gisaysay sa anak sa biktima nga si Guilerma Ababon, kasamtangang nanikay-sikay ang iyang amahan sa umahan dihang miabot ang suspek kauban ang mga igsuon niining sila si Bibo ug Billy ingon man anak sa suspek nga si Neres.
Sa walay igong rason kalit nga gipusil ni Nestor si Mario samtang mi-back up ang mga kauban niini. Human sa pagpamusil daling nangikyas ang lima sa lugar ug kasamtangan pang gipangita sa kapolisan.
Ang biktima nga naigo diha sa ulo daling gidala sa tambalanan. – BANAT NEWS