P2.5M gigahin sa Kabanhawan

CEBU, Philippines - Konseho sa lungsod sa Minglanilla migahin og P2.5 milyones alang sa selebrasyon sa Kabanhawan Sugat Festival.

Si Konsehal Jimmy Caumeran sa pakighinabi   sa mga tigbalita kagahapon mibutyag nga sulod na sa lima ka tuig gideklarar nga ang sugat sa Minglanilla usa na ka festival sa lungsod.

Sa unang Kabanhawan Sugat Festival ang lokal nga kagamhanan migahin og P1.2 milyones alang sa maong kasaulogan.

Apan sa mga mosunod nga tuig ug niining pagpahigayon sa festival P2.5 milyones na ang ilang gigahin.

Gawas sa pagpahigayon sa sugat pagkabuntag aduna pay mga kalihukan sama sa lumba sa kabaw, street dancing ug uban pa.

Kagahapon ang nahisgutang sugat sa Minglanilla ang giunhan sa usa ka Santos nga Misa nga nagsugod sa alas 3 sa kadlawon ug pagka alas 4 gisunod ang presentasyon sa sugat diin milanat ngadto sa tunga sa oras.

Si Victor Cuenco, adviser ug choreographer ug artistic direktor sa University of Cebu dance company ug organizer sa maong kalihokan mibutyag nga matag tuig gipaninguha nilang mapauswag ang mga presentasyon sa Kabanhawan Sugat Festival alang sa katagbawan sa mga mosaksi niini.

Niining tuiga, mikabat sa 200 ka mga bata nga nagpanuigon gikan sa 4-anyos pataas nga taga Minglanilla ang gihimong mga anghel kompara sa milabay'ng tuig nga 150 lang.

Sa laing bahin, si SPO4 Remegio Elacion sa Minglanilla police station mibutyag nga tanang mosulod sa compound sa complex diin gipahigayon ang sugat ilang gikapkapan ug hilingon ang mga bag niini aron walay makasulod nga tawo nga nagdala og mga hinagiban nga maoy hinungdan sa   kasamok.

Ang mga sakop sa Regional Mobile Group (RMG), Provincial Mobile Group (PMG), bomb squad, K-9 ug laing tulo ka team sa mga polis nga gikan sa Cebu Provincial Police Office ang gidestino   diha sa lungsod. - Brenda D. Batuto (BANAT NEWS)