House inquiry usik-usik lang
CEBU, Philippines - Gidasunan ni Cebu City acting Vice Mayor Hilario Davide III ang pamahayag ni Mayor-on-leave Tomas Osmeña nga usa lang ka pag-usik-usik sa panahon ang plano ni Kongresista Pablo John Garcia ang pagpahigayon og congressional inquiry labot sa Filinvest deal.
Kini bisan pa man og gipadayag na sa acting vice mayor ingon man sa ubang mga opisyal sa dakbayan nga andam nilang atubangon ang bisan unsang imbestigasyon.
Gani giangkon ni Davide nga subli na silang mituon sa Filinvest deal aron dili masayop sa ila unyang pagpanubag kun madayon ang house probe.
Apan matud sa acting vice mayor nga daghan na ang nangaging mga imbistigasyon nga gipahigayon ang kongreso apan kini giingong walay maayong sangputanan.
“Gaduda gyud ko anang congressional inquiry kay pila na man ka imbistigasyon ang gihimo in aid of legislation kunuhay pero wa may nabuhat gihapon,” sumala ni Davide.
Una nang gipadayag ni Osmeña nga siya dili mokooperar kung dunay himoong imbistigasyon ang kongreso labot sa Filinvest deal.
Kini may kalabutan sa pagpalit sa Filinvest ug 10 ka ektarya sa South Road Properties (SRP) ug paggamit niini sa laing 40 ka ektarya pinaagi sa pagpakig-joint venture sa siyudad.
Dako ang pagduda sa kongresista nga ang trans-aksyon dunay irigularidad hinungdan nga iyang gitinguha ang pagpahigayon og congressional inquiry niini.
Apan ang nahisgutang lakang ni Garcia gihulagway ni Osmeña nga usa lang ka matang sa harassment batok sa City government. – BANAT NEWS
- Latest
- Trending
