6 nahilo sa Donsol

CEBU, Philippines - Kritikal ang kahimtang sa unom ka mga tawo, lakip na ang 10 anyos nga batang babaye nga gituohang nahilo sa gikaon nilang donsol sa miaging gabii sa Sabado Santo sa sitio Soong, barangay Mactan, dakbayan sa Lapulapu.

Si Edcel Tampus, nurse on duty sa Lapulapu District Hospital miila sa mga biktima nga mao sila si Abundio Gulbe, 53, Neri Jean Rumbo, 10, Jonalyn Rumbo, 31, Joemaeie Rizalina, 29, Climaco Gulbe, 24 ug Renato Gulbe, 33 nga pulos nagpuyo sa maong dapit.

Si Tampus miingon nga unang nahidangat sa tambalanan nga walay panimuot tungod sa gibati nilang kasakit sa tiyan mao sila si Abundio ug Neri Jean.

Dali kining gihatagan og pasiunang pagtambal ug si Dr. Alimer Almirante nga nag-duty niadtong tungora mimando sa paghatod sa duha ka biktima ngadto sa tambalanan sa dakbayan sa Sugbo alang sa tukma nga pag-atiman kanila.

Dugang pa ni Tampus nga igo lang nga nakabiya og pipila ka gutlo ang duha ka mga biktima sa Lapulapu City District Hospital nga gikarga sa ambulansiya, lain pa nga upat ka mga biktima ang nahidangat usab nga gihatod sa ambulansiya sa Emergency Rescue Unit Foundation nga nagbase sa isla sa Mactan.

Matud pa ni Tampus nga gihatagan gihapon og pasiunang pagtambal ang upat ka mga biktima apan gibalhin gihapon sa tambalanan sa dakbayan sa Sugbo alang sa paghatag og tukmang pagtambal kanila.

Samtang si PO1 Rengie Fernandez sa Homicide Section sa kapolisan miingon nga nakuha sa nanagat nilang sakop sa pamilya ang donsol.

Gi-adobo kini sa pagluto ug sa dihang naluto mao kini ang ilang gisud-an sa panihapon sa miaging Sabado sa gabii.  

Sa paglabay sa pipila ka gutlo samtang nangaon sa donsol kalit lang misiyagit sa kasakit sa tiyan ang 10 anyos nga bata ug gisundan sa 53 anyos nga biktima hangtod nga gipanghatod sila sa tambalanan.

Si   Almirante nga maoy naghimog pakisusi sa kahimtang sa panglawas sa mga biktima ang kombinsido kaayo nga nakakaon kini og pagkaon nga makahilo.

Kini ang hinungdan sa gibati nga kasakit sa ilang tiyan ug nagpunay og suka maoy nakaingon sa gibati nga kaluya sa lawas sa mga biktima.

Si   Almirante miingon nga 90 porsiyento sa mga gikaon sa mga biktima   makahilo nga maoy nakaingon sa grabeng kasakit sa ilang tiyan ug pagsukasuka.

Hinuon si   Almirante miingon nga ilang ipaubos sa laboratory test ang nahibilin nga gi-adobong donsol nga gikaon sa mga biktima alang sa paghingpit sa pakisusi niini. – BANAT NEWS