CEBU, Philippines - Tulo ka mga sunog ang nahitabo sa managlahing lugar sa lalawigan sa Sugbo atol sa pagtimaan sa Mahal nga Adlaw niadtong milabay’ng Huwebes ug Biyernes Santo.
Ang labing dakong sunog nahitabo sa sitio Buac barangay Cayang siyudad sa Bogo niadtong Biyernes Santo sa alas 12:00 sa udto.
Matud pa ni PO3 Allan Dosdos, imbestigador sa Bogo City police dihang nahinabi sa Banat News hingpit nga naugdaw mao ang dakung plantasyon sa tubo sa maong lugar nga gipanag-iya sa Bomedco Compound Incorporated.
Si FO3 Candelario Ortega sa Bogo City Fire Department nitug-an sa Banat News nga gibana-bana nilang moabot sa P150 mil ngadto sa P200 mil ang danyos sa mga nasunog nga katubhan.
Subay sa inisyal nga imbestigasyon sa kapulisan dunay usa ka lalaking gituohang dunay deperensiya sa pangisip nga nakit-ang midagkot sa mga layang dahon sa katubhan ug tungod sa grabeng kainit sa panahon dali kaayo kining mikatap.
Samtang ang laing sunog nahitabo sa sitio Walog barangay Malhiao lungsod sa Badian niadtong Huwebes Santo sa alas 10:30 sa gabii nga miugdaw sa panimalay sa usa ka Arcenia Casiano. Ang maong sunog gikatahong diha sa kusina magsugod.
Kini gisundan sa laing sunog diha sa sitio Palaka barangay Poblacion, Alcantara sa alas 12:30 sa tungang gabii diin ang pinuy-anan sa usa ka Ponferia Elardo, 75, diriyot mahurot og kaugdaw.
Ang mga silingan nakabantay sa kalayo sa kusina ug ilahang gitabangan og bubo og tubig hangtud nga napawong apan midanyos gihapon og P5 mil.(Darrel Carumba) (BANAT NEWS)