Pumpboat nalunod 1 missing

CEBU, Philippines - Usa ang pabiling missing sa pagkalunod sa usa ka pumpboat nga dunay kinse ka mga pasaherong sakay sa kadagatan sa tunga-tungang bahin sa isla sa Kinatarkan ug isla sa Hilantagaan lungsod sa Sta. Fe sa Bantayan Island atol sa Biyernes Santo sa alas 6:00 sa gabii.

Ang mga pasahero sa maong pumpboat gikan sa isla sa Kinatarkan paingon unta kini mosaksi sa kalingawan nunot sa kapistahan sa isla sa Bantayan atol sa Semana Santa.

Ang maong pumpboat gikatahong gipanag-iya sa usa ka Andy Saagundo, una nang gika-report nga lima ra sa 15 ka pasahero ang naluwas hinungdan nga si Sta. Fe Vice Mayor Adoracion Cabrera mipahibawo dayon sa Task Force Igmat pinangulohan ni Supt. Erson Digal kabahin sa nahitabo.

Si Mayor Jennifer Illustrisimo mimando dayon inabagan sa TF Igmat pagpahigayon og rescue operation inabagan sa local disaster management.

Apan nianang pagka alas 12:30 kagahapon sa kaadlawon ang kapitan sa barangay Langub sa isla sa Kinatarkan nga si Kapitan Rolando Villacarlos mitawag ug mipahibawo kang Konsehal Rogelio Illustrisimo kabahin sa siyam ka mga pasaherong na-rescue sa mga mananagat sa ilang lugar.

Matud pa ni PO1 Melchor Mangompit sa Sta. Fe police dihang nahinabi sa Banat News, ang siyam giilang sila si Andy Saagundo, tag-iya sa pumpboat; Lindo Saagundo, Reds Saagundo, Ranillo Saagundo; Lovely Villacampa, Junard Villacampa, Benjie Villacampa, Reneboy Devina ug usa ka naila lang sa pangalan nga Ryan.

Apan matud pang Mangompit duna pay usa ang pabiling missing ang padayun pa karung gipangita sa ilang mga kaubanan sa paghimo ning balita.

Wala pa hinuon makakuha og pangalan ang kapulisan sa unang lima ka mga pasaherong naluwas tungod kay atua pa kini sa maong isla. (BANAT NEWS)